جواد څارګر
په داسې حال کې چې امریکایي ولس مشر ډونلډ ټرمپ دلوړې تر مراسمو کابو شپږ میاشتې وروسته هم، پر دې نه دی توانېدلای چې د اسلامي امارت پر خلاف دپیل کړای شوې جګړې لپاره ستراتېژي اعلان کړي؛ طالبانو دپرانستي لیک پر مټ خبرداری ورکړی چې دهغې جګړې چې ده ته له مخکنیو په میراث ورپاته ده، او دملیاردونو ډالرو په لګښت، دپرمختللیو وسلو په کاروَلو او مجهزو پوځیانو په میداني کولو لا هم نه ده ګټل شوې، پر پای ته رسولو هم په خپل ولس رحم وکړي، او هم افغان ولس دتحمیلي او بې ګټې جګړې له زیانونو وژغوري.
رښتیا هم دلته دبهرنیو پوځیانو شتون اوجګړه بې ګټې ده، او په ټوله کې دجګړې دغځولو لپاره هغه بانډ زیار باسي چې دروانې جګړې له برکته رزق خوري.
هوښیار او دملتونو نمائنده زعماء هیڅ وخت خپل ملت په یوه داسې بې ګټې جګړې کې نه لتاړوي چې دګټات هیڅ کوم څرک او امید یې نه وي.
طالبانو په پرانستي لیک کې ټرمپ ته جوَته کړې چې افغانان هغه مېړنۍ ملت دی چې دسرو روسانو پر ماتوَلو یې، نه تنها خپل ځان له تلپاته اسارت وژغوره بلکې ستاسو په شمول یې، پر ټوله نړۍ احسان وکړ چې دروسي ښامار له اسارت او منګولو یې وژغورله.
آیا د افغانانو دښېګڼې او احسان په بدله، تاسو پر افغانانو غله، مفسد، او اختلاسګر چارواکې تحمیلوئ؟!
حقیقت همدا دی چې ټرمپ راڼه حقایق او ځمکني واقعیتونه درک کړي، او دلاسپوڅو چارواکو او غاصبو ټوپکیانو په لاپو ـ شاپو دوکه نه شي؛ ځکه تاریخ ثابته کړې چې افغانان پردي نه مني، له پردیو نفرت لري، او دپردیو سره که څه هم په تش لاس وي، جګړه کوي، حتی خپل ځان په وهي خو پردي ځواکونه پر خپله خاوره ارام خوب ته نه پرېږدي.
ټرمپ باید وپوهېږي چې جګړه یې له داسې قهرمان ملت سره ده چې هیڅ زبرځواک ته، نه پر ملا مات شوي او نه یې پر خپله خاوره ځای ورکړی، برعکس دهر زبر ځواک غاښونه یې ورمات کړي، او سپېره مخونه یې له خپلې خاورې شړلي.
طالبانو دغه راز ټرمپ ته په یاد لیک کې ګوتڅنډنه کړې که چېرې د افغانانو پر خاوره جګړه پسې وغځول شي، افغان ولس به د امریکا له حریفو هیوادونو مرسته وغواړي، ترڅو امریکایي اشغال پای ته ورسوي.
طالبانو زیاته کړې؛ ټرمپ باید دداسې بدمخو او مفسدینو پر وعدو باور ونه کړي چې هم دوی ته چوپړ او تملق کوي او هم مهاله دنړۍ له نورو هیوادونو او استخباراتو سره، دشخصي ګټو لپاره نامشروع اړیکې لري.
دطالبانو وروستۍ ګوتڅنډنه ټرمپ ته خبرداری ورکوي چې ګواکې افغان ولس تر دې دمه پر خپلو کمو ـ تومو امکاناتو جګړه ورسره کوي او له هیڅ کوم بهرني هیواده مرسته نه اخلي، که چېرې تاسو دجګړې غځولو پرېکړه وکړئ، افغانان هم بدیل لارې ـ چارې لري او مجبور دي په دغو لارو غور وکړئ.
طلبانو شپاړس کاله دنړیوال استعماري اشر پر وړاندې مقاومت وکړ؛ په دغه شپاړس کلنه جګړه کې، دطالبانو سره دبهرنیو هیوادونو دپوځي همکاریو هیڅ کوم مؤثق لاسوَند، نه نړیوالو استخباراتي ادارو وموند او نه افغان روبوټي چارواکو، فقط خپلو پوځیانو ته دجګړئیزې روحیې ورکولو لپاره، له پیله تر دې دمه همدا یوه بابولاله غږوي چې ګویا طالبان دپنجاب په امر جنګېږي، په حقیقت کې دوی ټول پوهېږي چې پنجاب او کابل له یوې غولانځې شېدې رَوي.
افغان پوځیان دپنجاب په پوځي اکاډمیو کې روزل کېږي، اسلام آباد او کابل د استخباراتي رازونو دتبادلي تړونونه لري، او همدا تېره ورځ په کابل کې افغان چارواکو دپاکستان د استقلال ورځې په مناسبت اتڼونه کړي
دهمدې مزدورو چارواکو له لورې ډیورنډ ته څېرمه دشومو او پټو معاملو له مخې، بسته کلي پنحابي تسلط ته سپارل شوي او د افغان له جغرافیې ویستل شوي دي.
طالبانو په وروستۍ برخه کې شخصي کمپنیو ته دجګړې دسپارلو په اړه سوړ غبرګون ښودلای او ویلي یې دي؛ هغه جګړه چې په مجهزو پوځیانو یې ونشوای ګټلی، په کرایه قاتلانو او بدنامه او بې ضمیره قرادادیانو نشي ګټل کېدلای.
رښتیا هم دبلیک واټر اجرتیان دومره وړتیا او جرأت نه لري چې د ايډیالوژۍ په جګړه کې، دمقابل لوري ایماني ګذار ته تم شي
بلیک واټر به وکولای شي عام افغانان بمبارد کړي، ملي شتمنۍ یې چور او ملي تاسیسات یې دطالبانو دبدنامولو لپاره ونړوي، مګر دجګړې حالت به بدل نشي کړای او نه به یې د امریکا پر ګټه تمامه کړي.
د افغانستان دخپلواکۍ په هیله
