په لمانځه ولاړ ؤ
ملامحمد مطمئن
شوڼډې یې وچې سر ګګر ؤ په لمانځه ولاړ ؤ
د یار په مخ د غم اثر ؤ په لمانځه ولاړ ؤ
پرې ښکارېده له لرې،لرې خړ غبار د سنګر
غازي د څو ورځو نهر ؤ په لمانځه ولاړ ؤ
تور غټ زلفان یې په اوږو خواره واره پراته وه
څومره ښایسته،ښکلی بشر ؤ په لمانځه ولاړ ؤ
د عِشْق په بحَر کې تر دې حده ډوب شوی ؤ چې
له خپله ځانه ناخبر ؤ په لمانځه ولاړ ؤ
په مناجات کې یې له خدایه شهادت غوښتلو
په خوله یې لفظ د کوثر ؤ په لمانځه ولاړ ؤ
غازي سجده کې لوی رب ته څو ګېلې کولې
وخت مطمئنه ماذیګر ؤ په لمانځه ولاړ ؤ
