کابل غږ
ع- خاموش
تر اوسه پورې افغانانو د چا په حریم تېری نه دی کړی. نه یې د چا مذهب، کلتور، ژبې او قوم ته په کم نظر کتلي دي. تل پر افغان ولس تېری شوی، دین، کلتور او خاوره یې له خطر سره مخ شوې ده، د هر تېري کوونکي په مقابل کې یې خپله دفاع کړې ده، خپل کلتور او خپله خاوره یې د سرونو په قربانیو ساتلې ده. دا به څوک ثابته نه کړي چې افغانانو د چا پر خلاف د تېري بیرغ پورته کړی دی. انګرېزانو، صفویانو، روسانو او دا دی اوس امریکایي یرغلګرو ته وايي چې زموږ له خاورې ووځئ بیا به له بریدونو په امن یاست.
امریکا چې د بې ضمیره کمونستانو په څېر یې د خپلې خاورې څو دښمنان په یوه او بل نامه غلامان کړي، هغوی سره د غلامۍ په دوام مرسته کوي، خو له افغان ولس سره یې جګړې ته د دوام لپاره دا دی نور پوځونه راولېږل.
افغان ولس په وار وار وویل چې موږ جګړه نه کوو، د اسلام د مقدس دین په پیروۍ ژوند په سوله او امن کې دی؛ خو امریکایي جنرالانو د موجوده حکومت له غلامانو سره په افغانستان کې د جګړې د دوام او په افغانستان کې د مرکزي اسیا لپاره په افغانستان کې پنځوس کلنې پوځي اډي جوړوي، چې په اصل کې امریکا له سوله غوښتونکو افغانانو سره د پنځوسو کالو د جګړې اراده کړې ده.
تېره ورځ چې د شمالي کوریا لخوا نوی د لیرې واټن ویشتونکی میزایل وازمایل شو، امریکایي نظامیان تبې ونیول. د ملګرو ملتونو په وسیله یې له شمالي امریکا وغوښتل چې د اختلافاتو د له منځه وړلو لپاره امریکا له شمالي کوریا سره هر ډول خبرو ته تیاره ده.
د امریکا په مقابل کې شمالي کوریا وویل چې د امریکا د هر ډول تېري ځواب ته تیار دي. شمالي کوریا اعلان کوي چې یو په اتوم سمبال هېواد دی. امریکا ته یې خبر ورکړ چې هر وخت زور ازمایي کوي موږ دې مقابلې ته آمادګې نیولې ده.
تېره اونۍ امریکایي دفاع وزات، استخباراتو او د دفاع کمېټې اعلان وکړ چې افغانستان ته به نور پوځونه او بي-۵۲ بم غورځوونکې الوتکې ورکوي، خو له ملګرو ملتونو څخه یې غوښتي چې د یوه پلاوي په وسیله له شمالي کوریا سره د سولې خبرې کوي.
امریکا په دې پوهېږي چې افغانان په نړیواله او سیمه ییزه کچه او هم په ګاونډیانو کې داسې دوست نه لري چې دفاع یې وکړي، ځکه ورسره جګړه کوي او شمالي کوریا چې د چین په څېر غښتلي دوستان لري، ورسره د ټولو اختلافاتو د له منځه وړلو لپاره د جګړې پر ځای سوله کوي.
