۱۳ ګرامه ټیلیفون هم جوړ شو
په اوس وخت کې د نړۍ موبایل جوړوونکې کمپنۍ په نوې ټیکنالوجۍ او ځانګړنو سمبال غټ او پلن مخې سمارټ فونونه (ځیرک ټیلیفونونه) جوړوي. خو یوې برتانوۍ کمپنۍ د دنیا تر ټولو کوچنی ټیلیفون جوړ کړی دی.
د زینکو ټایني ټي۱ په نوم د دې موبایل فون وزن ۱۳ ګرامه دی او دومره غټ دی لکه د لاس ګوته!!
په دې موبایل کې د ځیرکو (سمارټ) موبایلونو ځانګړنې نشته، یواځې ټیلیفون کول (زنګ وهل) او میسیج ورباندې لېږل کېدای شي.
Zanco Tiny T1 ه ۴۶،۷ ملي مټره اوږد دی او ۱۲ ملي مټره سور (عرض / پسور) لري. ۱۳ ګرامه وزن لري. سکرین یې ۱۲،۵ ملي مټره دی.
که لږ پسې راتېر شو، دا د یوې ګوتې برابر او د یوې سکې په شان سپک موبایل کې 200 mAh بېټرۍ پرته ده چې چارجېږي. که خبرې ورباندې وشي، ۱۸۰ دقیقې یې بېټرۍ کار کوي، او که همداسې د تیارسئ (چې بند نه وي خو آن یا چالان وي) په حالت کې وي، بیا ۳ ورځې کار ترې اخیستل کېدای شي. Tiny T1 کې ۳۰۰ د موبایل نمبرونه ساتل کېدای شي او ۵۰ مسیجونه ساتلای شي. ۳۲ جي بي RAM او ۳۲ جي بي ROM لري. په 2G شبکه کار کوي.
د دې موبایل جوړوونکې کمپنۍ وايي چې دا موبایل به د راروان ۲۰۱۸ز کال په مئ میاشت کې بازار ته راووځي او بیه به یې ۵۰ ډالره (نږدې درې نیم زره افغانۍ) وي.
د Zanco Tiny T1 نور تصویرونه
بازار ته تر راوتلو وړاندې لا ځینو چارواکو ویلي چې دا موبایل باید بند شي او پر خرڅولو یې بندیز ولګېږي ځکه دا کوچنی ټیلیفون په بندیخانو کې بندیانو ته په اسانۍ سره لېږدول کېدای شي.
که بالفرض، دا ټيلیفون دلته هم راورسېږي، تاسې به یې واخلئ؟
زندان یا بل داسې ځای ته خو به یې نه درسره وړئ چې هلته د موبایل وړل منع وي؟!
