محمد نبي په بک باش سياليو کې غوره لوبغاړی وټاکل شو
(کابل ټکی کام، ۱۳۹۶، مرغومی ۱۷) د استراليا په بيک باش سياليو کې د افغانستان لوبډلې تکړه لوبغاړي محمد نبي د تېرې ورځې په سيالۍ کې تر ټولو ښه لوبه وکړه او د لوبې غوره لوبغاړی وټاکل شو.
په مېلبورن رېنېګېډز لوبډله کې افغان لوبغاړی محمد نبي تر ټولو ښه وځلېد.
نوموړي د ميلبورن سټار لوبډلې په مقابل کې د ۳۰ توپونو په مټ دوه شپږيزې، دوه څلوريزې او ټولې ۵۲ منډې جوړې کړې.
دغه راز محمد نبي ښه توپ اچونه هم وکړه، چې د څلورو اورونو په کولو سره يې يواځې اووه ويشت منډې ورکړې او د مخالفې لوبډلې تکړه لوبغاړی کيوين پيټرسن يې وسوځولو.
سټار لوبډلې مېلبورن رېنېګېډز ته د ۱۵۸ منډو هدف وټاکه خو دوی يوازې د څلور لوبغاړو په سوځېدو په ۱۸ اوورونو کې پوره کړ.
په تېرو لوبو کې محمد نبي ته یوازې یو ځل د توپ وهنې چانس برابر شوی و هغه هم په اتمه شمېره توپ وهنې ته استول شوی وو، خو پرونۍ لوبه کې کپتان ارون فېنچ دی په پنځمه شمېره توپ وهنې ته واستاوه.
بايد وويل شي، چې د بيګ باش ليګ سياليو کې د نړۍ د بېلابېلو هېوادونو لوبغاړي لوبه کوي، چې تر دې دمه پکې افغان لوبغاړو محمد نبي او راشد خان ښه ځلېدلي دي.
