(کابل ټکی کام ۱۳۹۶ مرغومی ۱۹ فرید افغان)
د غزني والي کریم متین رسنیو ته ویلي چې په دې ولایت کې د طالبانو د ډیر نفوذ لامل دادی چې هغوی پراخ ولسي ملاتړ له ځانه سره لري.
د والي په خبره تر هغو چې ولسونه د طالبانو حمایه کوي او د امنیتي ځواکونو پرضد یې اکمالوي د طالبانو پر وړاندې بریا ناممکنه او محاله ده.
نوموړي د غزني د ځینې ولسوالیو ستاینه له دې کبله وکړه چې یو شمیر وګړي یې د طالبانو د شتون مخالفت کوي.
متین د ناور،مالیستان او جاغوري ولسوالۍ د بیلګې په توګه یادې کړې چې په وینایې د خلکو د کم ملاتړ له کبله پکې طالبان پراخ حضور نه لري.
د غزني والي زیاته کړه؛ که ولسونه د طالبانو مالي حمایه ونه کړي هغوی خپله ماتیږي او په وینایې، دا ولسونه دي چې د حکومت پر وړاندې یې د طالب په نوم سنګر نیولی دی.
بل پلو په خپله والي هم د طالبانو په ملاتړ تورن دی او د ولایتي شورا یو شمیر غړي یې د طالبانو سره په لاس درلودلو تورنوي.
د ولایتي شورا دوه تنه غړي خالقداد اکبري او غلامحسین چنګیز وایي چې والي یې د طالبانو پراخ ملاتړ له ځان سره لري خو والي دا تورنه بې بنسټه بولي او ردوي یې.
والي داسې مهال داڅرګندونې کوي چې څو ورځې وړاندې یې په یوه ناسته کې د‹‹ صحرا باد›› په نامه وروستي عملیات بریالي بللي و او له طالبانو څخه یي د ډیرو سیمو د نیولو ادعا هم کړې وه.
ولسي خلکو او طالبانو له رسنیو سره په خبرو کې ویلي و، چې د حکومت عملیات له ناکامۍ سره مخ شو او په یوه اونۍ کې یې د پراخو تلفاتو په ورکولو او بې له کومې لاسته راوړنې ورته دپای ټکی کیښوده
