(کابل ټکی کام، ۱۳۹۶، مرغومی ۲۶) د کرکټ د ۲۰۱۹کال نړيوالو اتلوليو د غوراوي لپاره مهالويش اعلان شو چې پکې لس لوبډله ګډون کوي.
د غوراوي په دغو سياليو کې ټولې لس لوبډلې برخه لري، چې د مارچ له څلورمې نېټې پېلېږي او تر پنځويشتمې نېټې پورې به ټولې پنځه دېرش لوبې کېږي، چې يواځې دوه لوبډلې اتلولۍ ته لار موندلی شي.
په الف ګروپ کې وېسټ انډیز، ایرلنډ، هالنډ، پاپونیوګینې او د کرېکټ د نړیوالې شورا د دویم ډویژن ګټونکی هېواد راځي چې تر اوسه څرګند نه دی.
په بي ګروپ کې زمبابوې، افغانستان، سکاټلنډ، هانګ کانګ او د کرېکټ د نړیوالې شورا د دویم ډویژن د پایلوبې بایلونکی راځي او هره لوبډله په خپل ګروپ کې له يو بل سره يواځې يوه لوبه کوي.
د هر ګروپ درې د سر لوبډلې به دویم پړاو ته لار مومي. هلته به د مقابل ګروپ له درو لوبډلو سره لوبې کوي.
له دوه زره ديارلسم کال راهيسې د دري اتيا هيوادونو لوبډلو له يو بل سره د ۲۰۱۹م د نړيوالو اتلوليو لپاره سيالۍ کولې چې يواځې لس لوبډلې پکې بريالۍ شوي دي.
د افغانستان د تمريناتي لوبو مهال وېش: افغانستان ـ ویسټ انډیز، د فبروري اوه وېشتمه
افغانستان ـ نیدرلنډ، د مارچ اوله
د لومړي پړاو لوبې:افغانستان ـ سکاټلنډ، د مارچ څلورمه
افغانستان ـ زمبابوې، د مارچ شپږمه
افغانستان ـ هانګ کانګ، د مارچ اتمه
افغانستان ـ (WCL Division 2) سیالیو د دویم مقام ګټونکې لوبډله، د مارچ لسمه.
د دوه زره پنځلسم کال په نړيوالو سياليو کې افغانستان سکاټلنډ ته ماتې ورکړې وه، خو د غوراوي په راتلونکو سياليو کې ويسټ انډيز، زمبابوی او ايرلنډ سره به ورته لوبه تر يوه حده مشکلات پيدا کړي.
