ملي امنيت په امن ساتلو کې له ناکامۍ وروسته د تورونو لګولو دنده واخیسته
سرليکنه
په افغانستان کې چې د امريکا لخوا، له طالب وسله والو سره د مقابلې لپاره څومره ډالر ورکړل شوي، تر نيمايي زيات یې د ملي امنيت او استخباراتو په نامه وهل شوې دي. دفاع وزارت هم د خپلو دوه چنده جنګي لګښتونو په څرګندولو اشرف غني دې ته اړ کړ چې ووايي: که امريکا راسره مرسته ونه کړي، شپږ مياشتې مو هم اردو مقاومت نشي کولای.
دمخه به د دفاع، کورنيو چارو وزارت او د ملي امنيت په نامه جوړې ادارې د ولس د ساتنې په نامه د خيالي پوليسو، او ملي امنيت ادارې د استخباراتو په نامه غوړ معاشونه خپل امتيازات بلل. خو د کابل ښار په تېرو بريدونو کې چې دفاع وزارت د کابل ښاريانو په دفاع ونه توانېد، د کونيوچارو وزارت یې د امن په ساتلو، او د ملي امنيت په نامه اداره یې د استخباراتو سره په ګډو هلو ځلود پېښو په کشف کې ناکامه شوه؛ اوس درې واړو د دفاع پر ځاى په تورونو لګولو لاس پورې کړ.
دفاع وارت او ملي امنيت ادارې به دمخه طالبان په مرکز او ولاياتو کې د پوستو او ولسواليو د نيولو عاملين بلل، اوس چې یې په دفاع کې ناکام شول، په تشو تورونو د رسنيو سترګې ورتوروي.
د ملي امنيت مشر ايران او روسيه طالبانو ته په وسلو ورکولو تورنوي او تور لګوي چې طالبان افغانستان ته د داعش په رسولو کې لاس لري. له دغه ډول ويناوو سره په استخباراتو او د ملي امنيت په جوړه اداره کې مامورين هم همنظره نه دي، وايي که طالبان شمال ته د داعش په رسولو کې لاس ولري او ویې رسوي، بيا نو باید د ملي امنيت او استخباراتو زرګونه پرسونل د نشت برابر وګڼل شي.
ملي امنيت ته د خپلې دندې پر خلاف نوې دنده هم سپارل شوې ده هغه دا چې د امريکا لخوا شمال ته د شپې په تياره کې د څرخي الوتکو په وسيله د ناڅرګندو وسله والو رسولو په اړه د امريکا پر خلاف د ولسي وګړو د غبرګون مخه ونيسي. يو کال دمخه د شمال ولسي وګړو ويلي وو چې د شپې لخوا په تياره کې د څرخي الوتکو په وسيله جګړه مار راوړل کېږي او آن روزنيز مرکزونه هم ورته جوړ کړل شوي دي.
د افغانستان لپاره د روسیې ځانګړي استازي، ضمیر کابلوف، هم رسنيو ته ویلي و چې له ناټو سره مو په ناپېژاندو هلیکوپټرو کې د داعش جنګیالیو او لوېدیز جوړو وسلو د لېږدولو مسله مطرح کړې ده. په جوزجان کې د ناپېژاندو وسله والو مرکزونه د شمال د خلکو او ضمير کابلوف ويناوې تائيدوي. امريکا غواړي په افغانستان کې روانه ناامني د روسيې تر پولو ورسوي. افغان دفاع وزارت او ملي امنيت یې د تورونو لګولو ورسپارل شوې دنده ترسره کوي.
دمخه دفاع وزارت د خپل ولس په دفاع کې دومره ناکامه نه و، خو د پوليسو په ليکو کې د طالبانو نفوذ او له طالبانو سره د پوځي افسرانو ملاتړ دفاع وزارت، ملي امنيت او د کورنيو چارو وزارت په ګډه د طالبانو پر خلاف تبليغات پیل کړي دي، يو او بل هېواد په وسله ورکولو تورنوي څو ولس یې پر خلاف په يوه پاڅون لاس پورې نه کړي.
