د افغان حکومت غبرگ چارواکي په نړۍ کې د هرې پېښې له کېدو وروسته غبرگې اعلامیې خپروي. خپله غمشریکي ورسره شریکوي او ځان د نړۍ او د نړیوالو خواخوږي ښيي. ډېری چارواکي خپلې اعلامیې بیا سپانسر هم کړي او د ملت پیسې د مارک زوگربرگ حساب ته اضافه کړي.
ډېری وخت داسې هم کېږي، چې ډېر عادي چارواکي هم ورته کار کوي او یا ځینې پخواني چارواکي خپله غمرازي آن د همجنسپالو په مړینه هم ښيي. کله کله داسې اعلامیې خپرې کړي، چې له هغو هېوادونو سره موږ هېڅ ډول اړیکې نه لرو او په یا په نړۍ کې یې ډېر کم خلک پېژني.
دوې میاشتې وړاندې په اسلام اباد کې پښتنو سولهییز پرلت پیل کړی و. د افغان حکومت ډېری چارواکو یې دغه خوځښت وستایه. خو همهاله په هېواد کې ډېرې پېښې وشوې، چې ټول پرې غلي وو.
د گډ حکومت په راتگ سره امریکایانو او افغان حکومت په سلگونه ځلې سرغړونې کړي، چې ارگ پرې یوه د خواشینۍ اعلامیه هم نه ده خپره کړې؛ بلکې په ټولو یې سترگې پټې کړي او غوږونه یې پرې کاڼه کړي دي.
درې ورځې وړاندې په کندوز کې افغان ځواکونو د یوې دیني مدرسې په دستاربندي مراسمو بمبار وکړ، وروستي راپورونه ښيي چې له ۱۵۰ ډېر شهیدان شوي او له ۲۰۰ ډېر ټپیان شوي دي. په شهیدانو کې ډېری هغه ماشومان دي، چې عمرونه یې ان لس کلنۍ ته هم نه و رسېدلي.
پرون ارگ په یوه مکاره اعلامیه کې وویل، چې د کندوز د پېښې په اړه به څېړنه وکړي. موږ د حکومت څېړنې لیدلي، چې نه یې مجرم ته سزا ورکړي او نه یې څوک د ملکیانو د وژنې په تور اعدام کړي دي.
د دفاع وزارت تراوسه نه مني، چې په کندوز کې وژل شوي ملکیان دي؛ بلکې تراوسه په ډېره سپین سترگۍ وايي چې هلته وژل شوي ټول لوړ پوړي طالبان وو. په ټولنیزو رسنیو کې د هغو ماشومانو ویډیوگانې او انځورنه خپاره شوي، چې پکې لیدل کېږي چې ټول ماشومان دي. هغه ویډیو به مو هم لیدلي وي، چې د ماشومانو د څپلکو انبار ډېرۍ پرتې دي او له څپلکو او بوټانو معلومېږي، چې ټول ماشومان دي.
د دفاع وزارت له لوري جعلي ویډیو خپره شوه، خو نه د ویډیو نېټه سمه ده او نه یې ځای د دشت ارچي ولسوالي ده، بلکې ویډیو په شمالي وزیرستان کې شوې او څو کاله پخوانۍ ویډیو ده.
حکومت د خلکو په وژلو نه کېږي او نه خلک په وژلو کمېږي. پوره ۱۷ کاله امریکا، ناټو او افغان دولت دغه خلک ووژل؛ خو د حکومت پر وړاندې کینه او حسد ورځ تر بلې ډېرېږي. خلک له حکومت واټن نیسي او د حکومت له مخالفینو سره یو ځای کېږي. د طالبانو لیکې خپله حکومت پیاوړي کوي او نږدې هره ورځ سلگونه پولیس، اربکیان او د اردو عسکر د حکومت لیکې پرېږدي او طالبانو سره د واړه تکبیرونو تسلمېږي.
د کندوز په دشت ارچي برید ټول وژنه ده. حکومت او نړیوال باید بې پرې څېړنې وکړي. په پېښه کې ښکېل اړخونه باید محکمې مېز ته راکش کړل او د کړي جنایت پوښتنه باید ترې وشي.
