د داعش له تور مخه هره ورځ په سهوې او یا قصدي ډول پرده پورته کېږي. دغه خبرې عادي خلک نه کوي؛ بلکې لوړ پوړي چارواکي وايي: چې داعش د ملي یووالي حکومت گډه پروژه ده.
تېره اوونۍ د ملي امنیت پخواني رییس رحمت الله نبیل له طلوع نیوز سره په مرکه کې وویل، چې د ملي یووالي حکومت په لومړیو کې ترې غوښتل شوي وو، چې د داعش گواښ غټ وښيي او د ملي امنیت دغه کار د رسنیو په زور وکړ.
ده وویل، موږ داعش دومره غټ کړ، چې اوس په کابل کې هم بریدونه کوي.
د ولسي جرگې غړي حضرت علي هم په ننگرهار او هم په کابل کې د هغو سیمو نومونه هم یاد کړل، چې داعش وسله والو ته روزنه ورکول کېږي او له کابله ننگرهار او نورو ولایتونو ته لېږدول کېږي.
خو حضرت علي یوه ناځوانه وکړه، چې په ډاگه یې د مشرانو جرگې د مشر فضل الهادي مسلمیار نوم وانه خیست؛ خو په کنایه کې یې پوه کړ، چې نور له دې پروژې لاس واخله.
په ننگرهار کې یوازې مسلمیار نه دی، چې داعش ته پیسې، وسلې، د ټپیانو درملنه او نور تجهیزات ورکوي، بلکې له گلاب منگل نه راواخله، تر امنیه قومندان، د ملي امنیت رییس او گڼ لوړ پوړي چارواکي په دغه چاره کې لاس لري.
له دې وړاندې د ولسي جرگې غړي عبدالظاهر قدیر، د پکتیکا پخواني والي عبدالکریم متین او گڼ شمېر چارواکو ویلي وو، چې داعش د حکومت، ایران، پاکستان او امریکا گډه پروژه ده او د دې پروژې پرمټ غواړي طالبان کمزوري کړي او یا امریکایانو ته د پاتې کېدو پلمې په لاس ورکړي.
د ننگرهار د شینوارو سیمې اوسېدونکي له دې وړاندې په سلگونه ځلې ویلي وو، چې داعش ته په الوتکو کې وسلې راځي، ټپیانو ته یې د ننگرهار په هوايي ډگر کې درملنه کېږي، د ننګرهار له هوايي ډگره یې راډیو خپرونې کوي او د امریکایانو په الوتکو کې نورو سیمو ته لېږدول کېږي.
تېر ژمی د ننگرهار په خوږیاڼیو کې د داعش او طالبانو ترمنځ جگړو کې امریکا او حکومت د طالبانو هغه لیکې بمبار کړې، چې د داعش د پرمختگ مخه یې نیوله؛ خو بیا هم بریالي نه شول.
په چپرهار، اچین او هغو سیمو کې چې داعشیان فعاله دي اوس هم له خلکو سرونه پرې کوي، ډله ییزې وژنې کوي، خلک د سیمو پرېښودو ته اړ کوي او ډکې مېنې له خلکو تشې کړي دي.
دغه پروژه دلته هم الحمد لله ناکامه شوه او د امریکا او افغان دولت خوب یې رښتیا کېدو ته پرېنښوده، چې داعش به دلته هم د عراق او سوریې لوبه تکرار کړي او پر تش خلافت به خلک ورمات کړي، بلکې له داعش کرکه ورځ تر بلې ډېرېږي او د داعش د بریدونو قربانیان یوازې عام ولسي وگړي دي.
تېر کال د ګډ حکومت مشر اشرف غني په قهرجنه لهجه وویل، چې داعش زموږ پروژه نه ده، بلکې هغه خلک چې دغه خلک پر حکومت تپي ښه نه کوي. که د حکومت پروژه نه وای، نو د ولسمشر داسې غبرگون زر پوښتنې له ځان سره لرلای شي.
که امریکا او حکومت مني او یا نه؛ خو طالبان ځواک دی، ځواک به وي او ځواک وو. که دوی په جگړه ماتېدای؛ نو اوس به وختي طالبان له منځه تللی وای؛ خو نه حق نه ختمېږي او باطل له منځه ځي.
