د افغانستان روانه جګړه هره ورځ پېچلي کېږي. امریکا او حکومت دواړه وايي، چې اوسمهال په افغانستان کې ۲۲ ډلې فعالیت کوي. ځینې داسې پېښې هم کېږي، چې یوه ډله یې هم مسوولیت نه مني. نه حکومت، نه امریکا او نه د جگړې ښکېل اړخونه یې په اړه وضاحت ورکوي؛ بلکې ټول یې وغندي او بس!
حکومت تېر کال بلک واټر امریکايي کمپنۍ ته بلنه ورکړه، چې د افغانستان د امنیت ساتلو لهپاره دلته راشي. د بلک واټر امنیتي کمپنۍ په نړۍ کې مشهوره خونکاره خصوصي کمپنۍ ده، چې ډېر فعالیت یې په اسلامي هېوادونو کې دی. دوی قراردادي پوځیان روزي، الوتکې، وسلې او مجهز پوځ لري. په شیطانۍ کې له سي اې ای څو قدمه مخکې ده او په اسلامي هېوادونو کې خلک په قومونو، قبیلو، ژبو، سمتونو لومړی ووېشي او بیا یې په اړوند سیمو کې چاودنې کوي.
د بلک واټر په اړه څو کتابونه پښتو ته هم ژباړل شوي، چې د عراق او افغانستان ځینې پېښې په کې هم یادې شوي دي. په بلک واټر کې په سلو کې ۹۹ سلنه پوځیان حراموني دي. دوی ته د انسان وژل ساعت تېري ښکاري او د مسلمانانو وژل خو ورته مباح الدم(!) دي.
د بلک واټر ډېر فعالیت او تمرکز پر دیني مقدساتو دی. د مسجدونو نړول، چاودنې په کې کول، د مدرسو ورانول، چاپې، د زده کوونکو ترور، د ټولگټو پروژو نړول، په عامو ځایونو کې چاودنې کول او ځینې دیني علماء په مرموز ډول شهیدانول یې مهم لومړیتوبونه دي.
دوی د اشغال سیمې خلک په خپلو کې اخته کوي او نور بې غمه په غلا او لوټ کولو بوختېږي. کانونه، طبیعي زېرمې او تاریخي اثار غلا کوي او د خپلې جگړې لگښت له همدې لارې پوره کوي. افغانستان خو د کانونو ډکه خزانه ده او د امریکا او ناټو د بې اړتیا پاتې کېدو یو علت هم د افغانستان پراخه طبیعي زېرمې دي، چې دوې اوونۍ وړاندې د هلمند د یورانیمو د غلا خبر به تاسې ټولو اورېدلی وي.
داعش هم د امریکا او حکومت پر مټ تر کابله راورسېده او د داعش اوسنۍ جګړه په ښکاره چیغې وهي، چې دلته د سُني او شیعه ترمنځ جگړې ته لاره اواره کړي او امریکا او حکومت یوازې د مړو شویو خلکو شمېر رسنیز کړي.
د بلک واټر سکني وروڼو«داعش» په کابل کې د شیعه گانو څو تکیه خانې په نښه کړي او ډېر بریدونه یې هم پر شیعه لږکیو دي.
د خوست برید چا وکړ؟
تېره اوونۍ په خوست کې د بي بي سي خبریال احمدشاه د نامعلومه وسلهوالو له لوري ووژل شو. ډېری فعالانو دغه وژنه په خوست کې د کمپاین عسکرو کار وگاڼه او د ټولو خلکو پام د کمپاین عسکرو خواته واوښت. د کمپاین عسکرو له دې وړاندې هم په خوست کې سلگونه عام وگړي شهیدان کړي وو، چې روانه اوونۍ یې له دوبۍ نه راغلی مسافر هم شهید کړ.
پر کمپاین عسکرو افغانستان دولت هېڅ حاکمیت او واک نه لري، بلکې هر څه یې امریکا اداره کوي. امریکا معاش، وسلې، روزنه او د امریکایانو په امر عام افغانان شهیدانوي.
تېره ورځ په خوست کې د هغه مسجد سره نږدې چاودنه وشوه، چې د ټاکنو د نوملیکنې مرکز په کې پرانیستل شوی و. په برید کې ډېرو خلکو ته مرگژوبله واوښته؛ خو ټولو اړخونو رد کړ.
د کمپاین عسکرو یو ځل بیا د خلکو پام له خپلو ځانونو واړاوه او دغه ډول بریدونه پر طالبانو پسې وتپل شول. خو د طالبانو ویاند ذبیح الله مجاهد دغه برید رد کړ او ویې غانده. پر دیني مقدساتو یوازې بریدونه وحشي صفته انسانان کولی شي او دغه ډول بریدونه هېڅ توجیه نه لري. حکومت دې هم له مسجدونو، مدرسو او ښوونځیو د ټاکنو کار نه اخلي او دغه مرکزونه دې له عامه ځایونو ټول او د ولایت مقام ته ولېږدوي؛ ځکه خلک هسې هم په ټاکنو کې برخه نه اخلي.
