(کابل ټکی کام، ۱۳۹۷، غویی ۱۹) د بادغيس ولايت په مقر ولسوالۍ کې د جنګي جيټ الوتکو په بمبار کې سيمه ييزو پوليسو ته مرګ ژوبل اوښتې ده.
د بادغيس د ولايتي شورا غړي فريد اخي زی وايي، سيمه ييز پوليس د يادې ولسوالۍ په سنګه خير سيمه کې له خپلې پوستې بل ځای ته د تګ په حال کې و چې د جيټ الوتکو تر بريد لاندې راغلل.
نوموړی وايي، په دې بريد کې شپږ سيمه ييز پوليس پر ځای وژل شوي او يو شمير نور ټپيان دي.
د ولايتي شورا غړی وايي، ښايي يادې الوتکې د بهرنيو ځواکونو اړوند وې او په غلطۍ کې يې سيمه ييز پوليس په نښه کړي وي، ځکه چې پوليسو نظامي جامې نه وې په تن کړې.
د بادغيس د امنيې قومندانۍ وياند سرور داوري هم په یاده سيمه کې بريد تاييد کړی خو د جزياتو له ورکولو يې ډډه کړې.
تر اوسه په دې اړه په هېواد کې ميشتو بهرنيو ځواکونو څه نه دي ويلي.
تر دې مخکې، هم د بهرنيو ځواکونو په هوايي بريدونو کې ملي اردو، پوليس او سيمه ييز پوليس بمبار شوي دي.
تر اوسه د افغانستان دفاع وزارت د ياد بريد په اړه څه نه دي ويلي.
په عين حال کې طالب وياند قاري يوسف احمدي وايي، د مقر ولسوالۍ په مير حمزو سيمه کې يې يوه پوسته نيولې، د پوستې قومندان عبدالغفار وژل شوی او نور پوليس له سيمې څخه تښتېدلي دي.
