د حامد کرزي او اشرف غني هېڅ فرق نهشته. دواړه د امریکایانو پر اوږو سپاره راغلل او دواړه امریکایانو واک ته ورسول. خو کرزي یو کار وکړ، چې له امریکا سره یې امنیتي تړون لاسلیک نه کړ. امریکا د کرزي پر حکومت او کرزي ته په نږدې کسانو ټول زور وواهه؛ خو کرزی تر اخره پورې په خپله خبره ټینگ پاتې شو او امنیتي تړون یې له امریکا سره لاسلیک نه کړ.
د امنیتي تړون په تړاو په راغوښتل شوې لویه جرگه کې صبغت الله مجددي کرزي ته گواښ وکړ، که امریکا سره امنیتي تړون لاسلیک نه کړې، نو «هجرت» به وکړي. کله چې امریکایان له کرزي ناهیلي شول، نو اشرف غني یې د واک مېز ته راکش کړ؛ گنې د ۱۳۹۳ل کال د ولسمشرۍ په ټاکنو کې اوسني اجراییوي رییس عبدالله عبدالله ۵۴سلنه رایې وړې او اشرف غني ټاکنې بایللې وي.
د گډ حکومت بنسټ هم د امریکا په سفارت کې کېښودل شو. د حکومت په دویمه ورځ د پخوانیو جهادي قومندانانو په گډون د ملي امنیت شورا اوسني سلاکار محمد حنیف اتمر له امریکا سره امنیتي تړون لاسلیک کړ. له امریکا سره د شوي امنیتي تړون گټې او زیانونه موږ ټولو ولیدل. نه امریکا پر شوي تړون عمل کوي، نه د پاکستانیو توغندیو مخه نیسي، بلکې خپلسري کارونه یې هماغسې روان دي، لکه په ۲۰۰۱ز کال کې یې چې کول.
د حکومت له دغه عمل وروسته د ولسي جرگې غړیو او د مشرانو جرگې غړیو له امریکا سره د شوي امنیتي تړون ته په لویه سلنه د مثبت رایه ورکړه. هغه وخت ځینو خلکو له امریکا سره د امنیتي تړون مخالفت کاوه؛ خو دولتي خیاطانو به دوی«طالبان» بلل.
«د بهرنیو اډو پر ضد د ملي یووالي جبهې» په څو خبري ناستو کې مې واورېدل چې د دغه تړون زیانونه به دومره ډېر وي چې بیا به یې حکومت په هېڅ ډول جبران نه شي کړای. خو خبره هماغسې په رښتیاوو روانه ده او اوس د دغه تړون هغه خلک هم مخالفت کوي، چې څلور کاله مخکې یې په ملاتړ په کابل کې لاریونونه کېدل.
تېره اوونۍ د ننگرهار د چپرهار ولسوالۍ د دولتزیو په چینو کلي کې امریکايي عسکرو د مشرانو جرگې د رییس فضل الهادي مسلمیار پر کلي او د کورنۍ پر غړیو چاپه ووهله، چې ۹ تنه یې ووژل او څو نور یې سخت ژوبل کړل.
د هغه مسلمیار د کورنۍ پر غړیو امریکایان او ملگري یې چاپه وهي، چې د همدغو امریکایانو لهپاره د مسلمیار پر کړي خدمتونو څو کتابونه لیکل کېدای شي؛ خو امریکایان یې بیا هم وژني، بندیان کوي یې او ټپیان کوي یې.
زه د مسلمیار په تېر ژوند نه غږېږم؛ خو مسلمیار هغه څوک دی، چې د داعش وسلهوال اوس هم د مسلمیار په موټرو کې د جلال اباد ښار کې هدفي وژنې کوي، تر کابله یې مسلمیار رسوي، ډوډۍ، خوراک، څښاک او آن وسلې هم ورته هم دی برابروي. حتا د ننگرهار د عامې روغتیا په روغتون کې د داعشي وسلهوالو د درملنې ځینې عملیاتخونې همدغه مسلمیار برابرې کړي، چې په پټه او ښکاره یې په کې درملنه کېږي. مسلمیار د چپرهار ولسوالي مکمله د داعشیانو په ولکه کې راوسته، چې هره ورځ پکې یوه کس حتماً وژل کېږي.
مسلمیار تېره ورځ د مشرانو جرگې په غونډه کې له امریکا سره د شوي امنیتي تړون مخالفت وکړ او د دغه تړون مخالفت یې په نرمه لهجه وکړ؛ خو امریکا ته یې گواښ وکړ، که بیا داسې کار وکړي، نو پایلې به یې هم خطرناکې وي.
کاشکې د امریکایانو هدف نور هغه خلک وگرځي، چې له دوی سره یې پر شوي امنیتي تړون خوښي ښوده او یا یې مثبته رایه کارولې وه؛ ځکه دوی به د هغو خلکو له درده هم خبر شي، چې په تېرو اوولسو کلونو کې یې له امریکایانو درد لیدلی دی او لا هم درد ترې گوري.
مسلمیار صیب! زه د ستا د زامنو، وروڼو او نورو خپلوانو په وژنه خفه کېږم؛ ځکه جرم شخصي عمل دی او له امریکا سره د شوي تړون مجرم یوازې تاسې یئ؛ خو کاشکې په راتلونکې چاپه کې خپله داسې ژوبل شي، چې نه مري او نه ژوندی پاتې کېږي. بیا به تاته هغو معلومات هم وشي، چې دلته خلک ولې پر ځانونو پورې باروت تړي او د امریکا مخالفت کوي؟
