تميم توفيق
اشرف غني د اختر د خوښويو په پار اته ورځنی اوربند اعلان کړ او طالبانو بيا دغه اوربند ته تر غني زياته کلکه غيږه ورکړه. طالبانو په دې کار سره زباد کړه چې که اشرف غني يوه لويشت د وطن او ولس ارامۍ ته ورنژدې کيږي، دوی څلور لويشتې ترې وړاندې ځي.
په عنوان کې له يو پاو څخه د غني اوربند او له يو کيلو نه د طالبانو اوربند مراد دي، دا ځکه چې د اشرف غني په اعلان کې يوازې ډزبنديز ياد شوی، اما د طالبانو په اعلاميه کې مو تر دې ډير څه وليدل او راته واضحه شوه چې دوی تر بل هر چا زيات د سولې ارمانجن او د هيواد او ولس ثبات او سوکالۍ ته ژمن دي.
غني ډز بند کړ، خو طالبانو نه يوازې ډزبنديز اعلان کړ، بلکې د بند دروازه يې هم خلاصه کړه. غني د خارجي عسکرو اړوند، چې د شتون له امله يې همدا ناخوالې وينو، هيڅ نه دي ويلي، مګر طالبانو د معمول په څير د اوربند په اعلاميه کې هم د اشرف غني په شمول ټولې نړۍ ته يو ځل بيا ښکاره کړه چې دې بدمرغو جګړو ته اشغالګرو مجبور کړي دي؛ ځکه خو به يې د اختر په شپو کې هم په وژلو سرپه ونه کړي.
د اشرف غني او طالبانو دواړو دغه نيک اقدام د بې بها ستاينې وړ دی، خو تر دې هم زيات جانبينو ته ښايي چې دې د خير کار کې يو له بله ځان مخکې کړي او په جګړه ځپلي ولس لورولې دا څو ورځنۍ خوشحالۍ په تلپاتې خوښيو بدله کړي.
ګمان نه کوم چې د طالبانو په بنديخانه کې دي له جنايي او سياسي بنديانو پرته بل بې ګناه وګړی بندي وي او يا دې د محکمې له سزا ورکولو وروسته هم څوک پکې ساتل شوی وي، خو د غني زندانونه چخ په چخ له مظلومو کليوالو ډک دي او په سلګونو داسې سياسي بنديان هم پکې بې پوښتنې پراته دي چې د بندونو مودې يې کلونه وړاندې پوره شوې دي.
غني هم بايد له طالبانو د وړاندې کيدو هڅه وکړي، بايد په خپلو رګونو د افغاني او پښتني غيرت وينه وبهوي او په خپل ټول غيرت سره په خپله ځانګړې لهجه اعلان کړي، چې د هغو بنديانو خلاصون هم د دې اوربند برخه ده چې د دوسيو له څيړلو پرته د پلچرخي د تورو تمبو شاته پراته دي او يا د ده په امر د محاکمو له سزا ورکولو وروسته يو ځل بيا پرې د باګرام زندان ډک شوی.
غني هم بايد ځان ته غيرت ودروي او له طالبانو په سخته لهجه او واضحو جملو خارجي جګړه مارانو ته ډانګ پېيلی ځواب ورکړي او ورته ووايي چې نور دلته ستاسې حضور له زغمه وتلی، نور مو په دې بې چاره ولس د تورو الوتکو بې رحمانه بمبارونه او وحشيانه چاپې د منلو نه دي او نور موږ نه غواړو چې افغاني ابرو مو ستاسې له کرغيړنو خړو بوټونو لاندې شي.
