پرون مې په فېسبوک کې یوه ویډیو لیدله. په کونړ کې د داعش یو وسلهوال طالبانو نیولی. نیول شوی داعشي بېخي نوې خبرې کوي. دی وايي، ۶۰ ورځې مې له داعش سره تېرې کړې، لس ورځې امریکایانو نظامي روزنه راکړه او لس ورځې د داعش مشرانو، مخ پټو به د عقیدې درس راکاوه او راته ویل یې، چې بغیر له خلافت«داعشیانو» نور ټول کافران دي«العیاذ باالله». تاسې د طالبانو پر ضد جگړه وکړئ او .. کله چې مې حقیقت درک کړ، نو زه ترې راغلم او دلته طالبانو ونیولم.
امریکايي خلافتیانو ته بغیر له داعشیانو نور ټول کافران ښکاري او په تېرو څلورو کلونو کې یې د نړۍ ټولې جهادي ډلې مرتدې وبللې. القاعده، حماس، طالبان، جبهة النصره، بوکو حرام او …. دوی د امریکایانو له بیزه او د امریکايي جنراتور پر مټ چلېدونکې راډیو څخه تر ننه پورې طالبان مرتد بلل او ځانونه یې سپینې کوترې کړي دي.
د تېرې روژې په میاشت کې داعشیانو گواښ وکړ، چې په ننگرهار کې به د نجونو او هلکانو ښوونځي په نښه کړي. د ننگرهار په خوږیاڼیو کې یې د قیلغو د نجونو ښوونځي یو دېوال ونړاوه، یوه اوونۍ وروسته یې د ملکیار هوتک لېسي درې ساتونکي حلال کړل، د ننګرهار د پوهنې ریاست پر ودانۍ یې برید وکړ او پرون یې د جلال اباد ښار د پنځمې ناحیې پر ښاري مدیریت برید وکړ او ۱۶ تنه یې ووژل.
له پرونۍ پېښې یوازې یو تن ژغورل شوی او په ټولنیزو رسنیو کې به تاسې د پرونۍ وحشي پېښې انځورونه لیدلي وي، چې د خلافت مدعیانو څومره په رحمۍ سپین ږیري وژلي دي. پېښه پرون ۸ بجې شوې وه، خو پولیس او د ملي امنیت ځواکونه پوره دوه ساعته وروسته ورغلي، گنې د ملي امنیت او د پنځمې ناحیې ترمنځ لس دقیقې پلی مزل دی. د سرحدي پولیسو قرارگاه، د پنځمې ناحیې د پولیسو پوسته او نورې امنیتي ادارې ورسره په خوا کې پرتې دي. دغه ځنډ هغه شکونه په رښتیا بدلوي، چې امریکا، حکومت او داعش د یوه خره دوه غوږونه دي او چل یې یوازې عامو خلکو ته جوړ کړی، چې خلک پرې ووژني.
په ننگرهار کې معارف طالبان څاري. د ننگرهار په هغو ولسوالیو کې چې طالبان حاکم دي، د معارف ټولې چارې طالبان مخته وړي. د طالبانو د پوهنې مدیران پر ښوونځیو گرځي، غیرحاضر ښوونکو د حاضرۍ خانې قیدوي او کسر معاش کوي یې. نصاب یې گوري او پر دغه خبره د ننگرهار د پوهنې ریاست اعتراف هم کړی دی، چې طالبان ورسره د ښوونځیو په فعاله ساتلو کې مرسته کوي. طالبانو سره د دې ملت د راتلونکي وېره ده، چې یو نسل نالوستی پاتې نه شي.
طالبانو په تېرو اوولس کلونو کې له معارف سره هېڅ کار نه دی لرلی او له ځینو کتابونو پرته چې په ښوونځیو کې یې پر تدریس کولو بندیز لگولی، نور ټول د دولت نصاب پلی کېږي.
امریکايي خلافتیان غواړي زموږ یو نسل په تیاره کې رالوی شي او دغه کار د امریکايي په اشاره او د خلافت د تور بیرغ لاندې کوي. امریکا له یوې خوا د ښوونځیو له جوړولو سره مرسته کوي؛ خو له بلې خوا د داعشیانو پر مټ جوړ شوي ښوونځي ورانوي او بریدونه پرې کوي.
د امریکایانو د وتلو له اوازې سره سم، دلته هم د سوریې او عراق د لوبې تکرار روان دی. د جمیعیت ډلې لومړی د لوی خراسان د جوړولو هیله وکړه، وروسته یې غوښتنه تر ترکستان ورسېده او اوس د هزارستان کیسو هم زور اخیستی دی. دوی غواړي افغانستان ټوټه ـ ټوټه کړي. دغه یو موټی هېواد په څو هېوادونو ووېشي او ځینې برخې یې خپلواکې کړي او په رسمیت به یې هم لومړۍ امریکا وپېژني او په ملگرو ملتونو کې د پېژندلو اړتیا نه پیداکېږي؛ ځکه ملگري ملتونه خو له لومړي سره د امریکا په څرخ تاوېږي.
