ابو ياسر افغان
کمونیستي فکر والا لګیا دي وایي د نجيب د لاس وروستی نيالګي هم د مرګي خزان وځاپه او ولاړ، مستشرقین لګیا دي وايي د اسلام په کوم کتاب کې راغلي چې قهرمان ووژنه او بیا وایي دا د تندلاریتوب یا اسلامي فکر له برکته داسې ظلم وشو، ډیموکراتان لګیا دي چې نن یا سبا په اسلام آباد د افغانستان بیرغ رپوونکی جنرال قهرمان پنجابيانو مړ کړ، دا چې په اسلام آباد یې بيرغ هسکاوه نو دلته یې د دوی په اصطلاح له پنجابيانو ولې ځان و نه شو ساتلی دا پوښتنه لا په خپل ځای لاځوابه پاتې ده، د کوزې پښتونخوا نه هم یو څو خلقيان را لګیا دي او د حال په ژبه وایي: نیم افغانان به مو وژلي وای ښه وه، خو دا یو د نجیب لاروی به مو نه وژلو!! پاتې شول د فیسبوک پرصفحه د ځینو اسلامپالو نظرونه، نو دوی هم په غیر مستقیم ډول د قهرمان وژنه تقبیح کړې او غندلې ده، خو په ظاهره یې یو څه بدل رنګ ورکړی چې ګواکې موږ دا کار نه غندو خو خفه یو پرې، دا نو دا مانا لري چې څوک ووایي، زه نه ځم خو روان یم!!
د حیرانتیا ځای خو دا دی چې تر اوسه د یو مجاهد په مرګ ټولو خواوو په یو ځل خواشیني نه ده څرګنده کړې، دا خو لا څه چې څه موده مخکې د مولوي جلال الدین حقاني رحمه الله د مرګ خبر خپور شو، همدغو کسانو چې نن د جنرال قهرمان په مرګ ساندې لیکي او د خلقيانو وروستۍ تکیه ګاه یې ګڼي، هغه مهال د خوشحالۍ سندرې ویلې او اسلامپالو په ځانګړي ډول طالبانو ته یې پیغورونه ورکول، دا ډېره د تعجب خبره ده چې نن بیا د کوم دلیل له مخې د جنرال عبدالجبار قهرمان په مرګ د کمونيستانو څخه زیات د اسلامپالو فعالینو د خواشینۍ لیکنې مخې ته راځي، چې دوی د کمونيزم د لارویانو سره دا خواخوږي په کوم دلیل پیل کړه او ولې؟!!
که خبره د یو مهم شخص شي، نو قهرمان خو مخکې د روسانو لپاره ارزښت درلود او اوس یې امريکايانو ته کار کاوه، افغانستان، افغان ولس او اسلام ته یې څه خیر رسیدلی و؟ که خبره د پښتون شي او ځیني معترضین چې اسلامپاله هم په کې شامل دي، دا وایي چې ځکه خفه یو او خواشیني څرګندوو چې قهرمان یو پښتون و او د ده پر وژل کیدو د پښتنو مشرانو څخه یو تن کم شو ای کاش د ده پر ځای د شمال ټلوالې کوم جنګسالار وژل شوی وای، نو هغوی ته همدومره وایم چې موږ ته پښتونولي تر اسلام مخکې نه ده، بیا دا خو کوم، انجنیر، ساینس پوه، فیلسوف یا کومه بله تعلیمي سټه نه وه چې څوک دې ووایي یا دې تمه ولري چې کیدای شي نن نه خو راتلونکي کې به د اسلام لپاره د خدمت مصدر ګرځېدلی وای، بلکې دا یو جنرال و او بیا کاش چې ده اوس کوم کار کولای خو موږ پښتنو ته له ټلوالې زیات د دوی له لاسه پېښه ده، جنرال صيب سنګوریان روزلي وو خو د خارجیانو او پنجابيانو پرضد نه بلکې د هلمند د عام ولس پرضد، ښه نو کاش چې ده خو دا سنګوریان د شمال ټلوالې د کنترول لپاره روزلي وای، یا یې پرې د هیواد سرحدونه ساتلی، ده خو د هلمند عام ولس پرې داړلو ښه نو د داسې پښتون یې افغانانو ته څه خیر؟ پرون د روسانو لاسپوڅي او نن د امريکايانو، د داسې شخص، داسې پښتون او داسې جنرال نو ګټه څه وه افغانانو ته؟؟
زه دا نه وايم چې د ټلوالې جنګسالارانو څخه دا مهم و، خو دومره وایم چې د پښتنو د قتل عام لپاره د ټلوالې جنګسالاران نه راځي همدا د عبدالجبار قهرمان په څېر پلورل شوي د پښتنو د وینو تجارت کوي او چې دوی زموږ د پښتنو د قتل عام مسؤل دي، حتما به یې د مظلومو پښتنو آزار وهي، قهرمان باید د کمونیستانو له حاله عبرت اخيستی وای او نور یې بايد خپل ځان کنترول کړی وای، خو نه نه هغه یو بدمعاش هم و، د اشعالګرو خدمت یې دنده وه، د قتلونو عملي تجربې یې په عامو ولسي سیمو کې پر عامو افغانانو ترسره کولې او همغه و چې د خپلو اعمالو په سزا ورسېده، نا ویلي باید پاتې نه شي چې څوک زما د مومنو ولسونو قتل عام کې عملاً برخه اخلي، په وژل کیدو مو خوشحالي لمانځي د داسې خلکو په غم غمرازي راته د خپل ایمان، وجدان او خپلو خلکو سره ستره جفا ښکاري، دا کمونيستان د شهیدانو، کونډو او یتیمانو آزار وهلي او یو یو به ختمیږی، نه یې پښتو مهمه ده نه یې مهارت او تجربه، چې د اسلام خلاف د کفر صف کې ولاړ وي دا به یې حال وي.
د ټلوالې قوماندانان به زموږ دښمنان وي، مګر د خپلو خلکو لپاره یې ډېر کار کړی او کوي یې، مګر زموږ د پښتنو له منځه راوتلي د قهرمان په څېر خلک بیرته پر موږ پښتنو د مرګ میچنې ګرځوي، نو څنګه یې په مرګ خفه شم؟ آيا د سنګوریانو په نوم د قهرمان د ډلې له ظلمونو او وحشتونو خبر نه یاست؟؟ آيا د امریکایانو په ملګرو خواشیني یاست؟ نن ولې د کمونیستانو سره غمرازي کوئ؟؟ هغوی خو ستاسو د نسل په ختمولو پسې راخیستې او تاسو یې د مشرانو په مرګ د غم ساندې لیکئ، مطلب دا چې لږ فکر وکړئ، که همدغه ډول خلک د صلیبیانو ملاتړ و نه کړي، صلیبیان دلته وخت نه شي تیرولی او بیا دوی خو زموږ پخواني قاتلان دي، په مرګ یې د ساندو لیکلو وړاندې تاریخ وګورئ، مفکوره یې وګورئ، د اسلام او جهاد سره دښمني یې وګورئ، نو بیا به کله هم د داسې قاتلانو او جنګسالارانو په مرګ د خفګان احساس و نه کړئ.
