تميم توفيق
وايي چې کابل پوهنتون کې محصلين په نشه يي ګوليو روږدي شوي دي، خبر کې راغلي چې دغه نشه يي ګولۍ د خوب تښتولو په خاطر کارول کيږي، مګر دا خبره له عقل او منطق خورا لرې ښکاري، يقين ته نژدې ګمان کيږي چې دوی له دې وړاندې په نورو نشه يي موادو روږدي شوي او په پوهنتون کې د هغو د نشتون له امله يې ګوليو ته مخه کړې ده.
په هر تقدير، دا هم زمونږ په مسلمان هيواد د راتپل شوې ديموکراسۍ له ګڼو تحفو څخه يوه ده، چې افغان ملت به د نورو بدمرغه هغو په نسبت زيات په ځور او رنګارنګ بدبختيو مبتلا کړي.
دلته د راوړې ديموکراسۍ بهرنيو او کورنيو مدعيانو ادعا کوله چې افغان ملت له تعليمي اسانيتاوو محروم ساتل شوی دی او حتی د مطلق تعليم او تربيې مخه یې نيول شوې ده او دوی غواړي چې په نړيوالو معيارونو برابر تعليمي سهولتونه ورته برابر کړي.
زمونږ د ګران ولس ځينې ساده ګان په همدې غوړو او خوږو تيروتل، چې په پايله کې يې ځينو په ناخبرۍ او ځينو په شعوري توګه د تعليم او تربيې د واقعي مدعيانو مقابله پيل کړه، بد رد يې وويل او له غربي تبليغاتو په تأثر په دې ميدان کې دومره پر مخ لاړل، چې په شرعي فضا کې د تعليم حاصلولو نظم او ترتيب يې نقد او حتی وښکنځلو.
وجه دا وه چې دوی يوازې د غربيانو او غرب پلوو د ژبې پر سر خوږو خبرو باندې تيروتلي وو، چې دې خبرو ته په نظر يې ګرم هم نشو بللی، مګر په دې ځای يې سر نه و خلاص شوی چې غربيان لکه څنګه چې په اقتصادي، سياسي او استثماري برخو کې له ځان نه د چا وړانديوالی نه خوښوي، همدارنګه نه غواړ چې په تعليمي ډګر کې ترې څوک پيش قدمي وکړي او يا اقلا موازي حرکت ورسره وکړي.
دوی افغان ولس د خپلو افغان نما غرب پرستو په خولو تيرايستل او په عين حال کې يې په تعليمي ډګر کې څه سهولتونه هم ورته مهيا کړل، خو له دې بوسو لاندې يې خورا مردارې اوبه تيري کړې، چې دا دی نن يې نتېجه موږ وليدله او لا به يې ووينو.
د غربيانو حلقه بګوش اشخاصو افغان محصلين داسې بهرنيو تعليمي ادارو ته د بورسونو له لارې واستول چې ډير کم يې له افغانيت او اسلامي سليقې سره راستانه شول، څوک د صهيونيزم ښکار شول، څوک په هندوييزم ورګډ شول، څوک له سيکولر فکر سره راوګرځېدل، څوک عيسايان او څوک له نوي غربي ماډل څخه متاثر او څوک يو مخ له الله تعالی منکر شول.
په دوی کې يوازې هغو محصلينو د غربيانو له لومې نجات وموند او مستقبل يې له بربادۍ وساتل شو، چې د خپلې کورنۍ تر نظارت لاندې وو، دوی که څه هم د غربيانو ښکار ته برابر شوي و، خو د لويديځوالو په مکاري آګاه متدينو کورنيو يې لاس نيوی وکړ او له هغو بدو لارو يې راوګرځول چې له شريعت او افغانيت دواړو سره په ټکر کې دي.
کابل پوهنتون کې په نشه يي موادو د محصلينو روږديدل کومه معمولي خبره نه ده، دا د افغانانو د راتلونکې ګډوډولو لپاره د لويديځوالو او کورنيو غرب پرستو يو پلان دی چې عملي کوي يې. افغان ولس بايد دغه وضعيت بابيزه ونه ګڼي، ګنې لرې نه ده چې د نيکمرغه مستقبل په هيله ليږلی اولاد يې په رنګارنګ مصيبتونو مبتلا کړي او يا خدای مکړه د کمونيستې دورې د ځينو محصلينو په شان يې ننني زامن هم له خوندو سره د نکاح غوښتنه وکړي.
