(کابل ټکی کام، ۱۳۹۷، لیندۍ ۲۶)
د لوګر مرکز پُل علم مربوط سيمه کې پر يوې سراچه موټر بريد شوی چې په ترڅ کې يې شپږ کسان وژل شوي دي.
دغه بريد پرون ماښام د مرکز اړوند د څرخ ولسوالۍ پر عمومي سړک ترسره شوی دی.
د دفاع وزارت په يوې خبرپاڼه کې ويلي، چې بريد پر مخالفو وسله والو شوی چې يو موټر يې له منځه وړل شوی او پکې شپږ کسان وژل شوي دي.
خو ځايي سرچينې او طالبان وايي، دغه بريد عامو خلکو پر يوه موټر شوی چې له امله يې شپږ ملکي وګړي وژل شوي دي.
طالب وياند ذبيح الله مجاهد په خپله رسمي ټويټر پاڼه ليکي: تير ماښام د څرخ ولسوالۍ په عمومي سړک “امريکايي اشغالګرو د ملکي خلکو په سراچه موټر بمبار کړی، شپږ تنه مظلوم هېوادوال په شهادت رسېدلي او موټر يې ويجاړ شوی دی”.
د سيمې اوسېدونکي هم وايي، دغه بريد د عامو خلکو په موټر شوی او پکې وژل شوي کسانو له طالبانو سره اړيکې نه لرلې.
تر اوسه په دې اړه په افغانستان کې میشت بهرنيو ځواکونو څه نه دي ويلي، خو تر ډيره ورته ډول بريدونه د بهرنيانو له خوا ترسره کېږي چې پړه يې دفاع وزارت په غاړه اخلي.
په وروستيو کې يوځل بيا د بهرنيو ځواکونو هوايي بريدونه او بمبارۍ زياتې شوي چې تر ډيره يې قربانيان ملکي وګړي وي.
