(کابل ټکی کام، ۱۳۹۷، مرغومې ۱)
د افغانستان کرکټ بورډ وايي، د ۲۰۱۹کال کرکټ نړيوالو سياليو “جام” روانه اوونۍ د چهارشنبې په ورځ افغانستان ته راوړل کېږي.
د سرچينې په وينا، دغه جام به لومړی د کابل په هوايي ډګر کې د ځانګړو مراسمو په ترڅ کې د کرکټ بورډ اجرايوي مشر شفيق الله ستانکزی ترلاسه کړي او له هغه وروسته به د دارلامان او ولسمشريۍ ماڼيو ته يوړل شوي.
د کرکټ بوډ وياند فريد هوتک وايي، دغه جام د دسمبر په اووه ويشتمه باميانو ته وړل کېږي، هلته له پروګرام وروسته به هرات او کندهار ولايتونو ته يوړل شي چې په دې اړه د يادو ولايتونو له چارواکو سره هم ناستې شوي او د جام لپاره د ترسره کېدونکو مراسمو ته ځانړي تدابير نيول شوي دي.
د کرکټ نړيوال جام تر دې مخکې نورو هېوادونو ته هم وړل شوی خو په پام کې ده چې له افغانستان وروسته نيپال، امريکا او جرمني ته په لومړي ځل واستول شي او دغه راز د فبرورۍ په نولسمه انگلستان او وېلز ته له رسېدو وړاندې عمان، امریکا متحدو ایالتونو، وېسټ انډیز، سرېلانکا، پاکستان، بنګلدېش، نيپال، هندوستان، افغانستان، نیوزيلانډ، استرالیا، سوېلي افريقا، کېنیا، روانډا، نایجريا، فرانسې، بلجيم، نیدرلنډز او جرمني هېوادونو ته هم وړل کېږي.
د افغانستان کرکټ ملي لوبډلې د روان ميلادي کال په اپريل مياشت کې د غوراوي پړاو سياليو په ګټلو سره د ۲۰۱۹کال نړيوال جام ته لاره وموندله.
د کرکټ نړيوال جام راتلونکې لوبې د ۲۰۱۹کال په جون مياشت کې په انګلستان کې ترسره کېږي.
