آصف الله آصفي
د افغانستان په ټول 5000 کلن تاریخ کې به تر دې کچې سرټیټی، غلام او درواغجن حکومت نه وي تیر شوی، لکه اوسنی په نوم ملي حکومت.
په غاړه کې یې وسله، په خیټه کې یې ډوډۍ، په غاړه کې یې یونیفورم، په ټوپک کې مرمۍ، هغه ټانک چې دی پرې سپور دی، په ټانک کې یې تیل، هغه ودانۍ چې دی پکې شپې سبا کوي، هغه مرچل چې دی پکې ځان مصؤن کوي او پر خپلو خلکو ډزې کوي، هغه معاش چې دی پرې خپلې میرمنې او اولادونو ته خوراکي او غیر خوراکي توکې برابروي او وروړي، هغه ډوډۍ چې دی یې د خپلو میرمنو او اولادونو په خوله کې اچوي، هغه الوتکې چې دی پکې په هوا کې ګرځي او پر خپلو هیوادوالو درانه بمونه غورځوي او داسې نور… دا ټول هغه څه دي چې هغه نصارا یې ورکوي چې په قران کې یې ذکر راغلی؛ نو معلومه خبره ده چې: (کسې که نان میدهد فرمان میدهد) یعنې څوک چې چا ته ډوډۍ ورکوي؛ نو حتما همغه فرمان او امر هم پرې کوي او هغه مجبور دی چې د هغه امر او فرمان په پټو سترګو ومني؛ ځکه چې بیا خپله هم وږی پاتې کیږي او میرمن او اولادونه یې هم.
زمونږ حکومت هم په عین کټګورۍ کې قرار لري، چې ټول انس او جن پرې په غړیدلو سترګو شاهدان دي او ټوله نړۍ یې په خلاصو سترګو ویني، خو سره له دې په ډیره بې شرمۍ سره بیا هم ځان ته ملي حکومت وایي!؟ او پر سټیج باندې غورې دربې هم کوي، چې مونږ نور سر وهو او سنګر نیسو!؟ خو د اسلام د دښمن (نصاراو) په مټو او ریموټ.
د دې حکومت بادار ته چې په قرآن مجید کې الله تعالی ورته (الضالین) یعنې بې لارې شوي خلک ویلي دd، اوس هغه څوک چې خدای ورته بې لارې شوي خلک وایي زمونږ هیواد ته راغلي او پر مونږ یې د جان کیري په لاس حکومت حاکم کړی، لارې هم ورته ښیې او پنځه وخته لمانځه کې یې په ۳۲ رکعتونو کې یې 32 کرته د دعا په څیر یادوي او همدا دعا کوي چې ای خدایه! مونږ ته د دې یعنې (بې لارې شویو نصاراو) لار مه راښیه یعنې نصارا چې عیسویان هم ورته ویل کیږي او نن سبا امریکایان او نور غربي هیوادونه چې د امریکا متحدین دي او ټول د افغانانو وژلو ته د حشر په توګه افغانستان ته راغلي، ټول نصارا دي، چې خدای پاک بې لارې شوي خلک بللي دي، خو بیا هم ګورو چې زمونږ ریموټي حکومت د بې لارې شویو لار تعقیبوي.
دا لا څه چې د هر څه قومانده یې هم د همدوی ده او چې دوی هر څه ورته وایي همغه انجاموي او خپل ټول سیاسي او نظامي فعالیتونه يې د همدوی په امر، قومانده او ریموټ عیار کړي دي. تاسې ولیدل چې په دې نږدې ورځو کې یې پر خوارو او غریبو او بې وزلو خلکو څومره چاپې ووهلي او څومره خلک یې د ماشومانو او بې ګناه میرمنو په ګډون تر خاورو لاندې کړل او په سرو وینو کې یې ولمبول.
دوی بیا په ډیرې بې شرمۍ سره هره ورځ د خلکو د تیرایستلو لپاره 32 رکعته لمونځ هم کوي او 32 کرته دا دعا هم کوي چې: اهدنا الصراط المستقیم: یعني اې خدایه! مونږ ته سمه لار (د اسلام لار) وښیه. صراط الذین انعمت علیهم: یعني د هغو خلکو لار راوښیه چې تا ورباندې انعام کړی یعني (د سوچه او رښتینو مسلمانانو لار). غیر المغضوب علیهم: یعني اې خدایه! د هغه چا لار مه راښیه چې ته پرې باندې په قهر غضب او غوصه یې، یعني د (یهودو لار). او د بې لارې شویو خلکو لار مه راښیه، چې مراد ترې (نصارا) یعنې (اوسني امریکایان او غربي متحدین یې دي).
اوس دې لوستونکي حقیقي او دقیق قضاوت وکړي چې آیا حقیقتا دا ملي حکومت دی که ریموټي حکومت؟
