(کابل ټکی کام ۱۳۹۷ مرغومی ۱۴)
په داسې حال کې چې طالبانو تل ویلي او دا یې په اثبات رسولې چې دوی د پاکستان تر واک لاندې نه دي، مستقل سیاسي لیدلوری لري او پر خپلو ملي ارزښتونو له هیچا سره معامله نه شي کولی، تازه یوه امریکایی سناتور لیندسي ګراهام وړاندیز کړی چې امریکا باید پاکستان ته د افغان سولې د راتلو په تړاو امتیاز ورکړي.
نوموړي له سي ان ان سره په مرکه کې ویلي، امریکا باید پاکستان ته ژمنه ورکړی چې که طالبان یې مذاکراتو ته چمتو کړل، آزاد تجارت به ورسره پیل کړي.
ګراهام ویلي، که پاکستان ورسره طالبان د دوی په خوښه مذاکراتو ته چمتو کړل، نو بیا به امریکا هلته د ترهگري او داعش ځالې ختموي.
نوموړی وایي، امریکا باید هیڅکله افغانستان پرې نږدي که څه هم ترهګر په کې نه وي.
امریکایي سناتور داسې مهال دا وړاندیز کوي چې تر دې وړاندې راپورونه ورکړل شوي و، چې متحده عرب اماراتو درۍ میلیارده ډالر پاکستان ته په دې موخه ورکړي چې طالبان له خپلو شرایطو تیر او له افغان حکومت سره یې جوړجاړي ته وهڅوي.
دا فشارونه داسې مهال مخته راځي چې پاکستان په تیرو کلونو کې په عملي ډول ثابته کړې چې پر طالب مشرانو نفوذ نه لري چې وروستۍ هڅه یې په ابوظبۍ کې وه چې د بهرنیو چارو وزیر “قریشي“یې د افغانستان حکومت ته ټټر وهلی وو، چې طالبان به ور سره مخامخ خبرو ته کینوي، خو له ټولو هڅو سره سره بریالی نه شو..
