انسان حریص دی، له هوس ډک دی او د هوس د اشباع لپاره له خدایه عزت او شهرت، دولت او قدرت، دژوندانه لذت او راحت غواړي او تر ټولو ستره هیله یې د ژوند د پای کلونو کې د آرام ژوند تېرؤلو وي
استثنی به ولري مګر دډېرو انسانانو غوښتنې همدغه دي چې په مختلفو لارو او طریقو ئې ترلاسه کؤل غواړي خو داسې انسانان به ډېر لږ وي چې د ځان په ذلت دولت، قدرت او شهرت ترلاسه کول ئې طبعیت او وجدان ته دمنلو وي.
یرغلګر ممالک تر یرغل لاندې هېوادونو کې په ډېر هنر او مهارت د ائنده نسل پر یو مخیز فکري تحریف کار کوي؛ انګریزي ښکېلاک په سیمه کې دخپلې واکمنۍ د ټېکاؤ په پار خانان، نوابان، اربابان او ملکان په پښو درولي ول، له دوی ئې قوي ملاتړ کاؤه او د ملاتړ پر بدل کې ئې ساحې پرې ساتلې او څارلې.
روسانو چې پر زور کمونستي مفکوره خپرؤل غوښتل او په لومړیو کې ئې د علماؤ وژلو ته برید ښخ کړ، له مفکورې سره نیست او نابود شول او امریکایان بیا هوښیاران دي
امریکایانو د انګرېزانو پر پل فکري تحریف ته پام واړاؤه خو تر انګرېزانو ئې څانګه بدله کړه او د اصطلاحاتو تغیر ئې پیل کړ
هغه داسې چې په لاس تړليو غلامانو پسې مختاړي او وروستاړي وتړي، یو څه موده ئې درسنیو له لارې وځلوي، پورته پورته ئې کړي او چې سم ئې مشهور کړي دهاشم لوګري په لهجه ډرت شي واک ځواک او اشغال کړای شوی هېواد ورته وسپاري.
ګلاغا شېرزی چې له پیله د کابل اداره کې په لوړو پوستونو پاته شوی دی، او اوس هم برحاله وزیر دی. کله چې ریاست جمهوري ته کاندید و، یوې غونډې ته ئې وویل؛ که چېرې زما کور ودانه یهودڼه وای زه به د نړۍ لومړی مفکر وم
شېرزی چې په تعلیمي لحاظ صفر او سیاسي ډګر کې ناولده دی، هغه مهال ئې پر خبرو خلکو ملنډې ووهلې مګر دا سوچه حقیقت دی او وخت به هغه څېرې تدریجاً بربنډې کړي چې اشغالګرو ماسکونه پرې تړلې دي
همداسې یو تېر ایستونکی ماسک دکابل ادارې په موجوده مشر هم تړل شوی دی؛ دمفکر صاحب پر تفکر که یو ځغلنده نظر واچول شي، سړی ژر پوهېږي چې مفکر صاحب له څومره عالي! تفکر څخه برخمن دی
هغه څوک چې پر خپله مورنۍ پښتو ژبه کې ئې د داسې انقلابي شاعر چې دپښتنو په بابا سره یادېږي دمشهور شعر یو بیت نه وي زده، هغه مفکر کېدلای شي؟
دمورنۍ ژبې متل ئې نه وي زده، دعوه د مسلمانۍ کوي مګر بخاري او مسلم نه پېژني، شیخ سعدي ته پیغمبر وایي، امام حسن او حسین رضي الله عنهما ته’نواسه خدا’ وایي، د جنازې او اختر لمونځونه ئې نه وي زده؛ په کوم معیار او علمیت ‘مفکر دوهم جهان’ کېدلای شي؟!
ښه دا به دمفکرصاحب تفردات یا انسي ضعف وبولو او ترې تېر به شو؛ دمفکر په واکمنۍ کې کابو هره شپه بېګناه افغانان وژل کیږي، مفکر صاحب کوم غبرګون وښود؟
په اروپا او امریکا کې که چېرې یو سپی په واوره کې وښوېد او ومړ، له دې ځایه د مفکر او مفشن صاحبانو له لورې دتعزیت بلها مراتب ورتقدیم شي، مګر د افغانې مورکۍ سوې کرېکې او د اولاد سوځېدلی بدن ئې ددوی په سترګو پرتې د اشغال پردې نشي پورته کولای او نه ئې زړونه درد پرې کوي
ممکن دوی زړونه ولري، درد هم وکړي خو دا چې دوی غلامان دي د بادار له ډاره سپڼ هم نشي کولای
ځکه ورته وایو چې ‘ته څوک یې؟!’
که ته افغان وای دخپل ملت پر قتل عام به دې ږغ پورته کاؤه، له ملت درتېر؛ د ملت پر قتل عام دږغ پورته کولو پر جرم دې خپل حقوقي مشاور له دندې ګوښه کړ، که چېرې ته افغان وې پرون چې په روزګان کې اردو دربمبار کړه دهغوې پوښتنه خو به دې کوله؟
معلومه ده چې ته نا افغانه یې او پر افغانیت نه درېږې، نه دردېږې؛ برعکس د افغانانو له دردونو او په امریکایانو له درودونو خوند اخلې.
طالبان له تا سره کومو مذاکراتو ته کښېني؟!
ته که افغان وای د افغانانو وژنه به مو غندله او قاتلانو ته به مو په سترګو کې سترګې اچولای. ته څنګه افغان ئې چې ستراتېژیک تړونیان دې هره شپه هېوادوال وژني او تا یو غوږ لمڅی او بل بړستن کړی دی؟
څنګه چې ستا هویت مشکوک دی او افغانانو ته دتاریخ تورداغ ئې، همچنان ستاسره د سولې ناسته او خبرې پر افغانیت ملنډې وهل دي
هغه تا، او ستا بلواک بانډ چې پرديپال حرکت او جنګیالي بلل هغوی درته په نړیوال فورم ثابته کړه چې اصیل افغانان دي. تاسې او بادار مو اسلام اباد ته د سوال لمن نېولې وه، هغوی د سولې ناسته ابوظبي ته ولېږدوله او کله مو چې بیا د سولې ادرس غلط کړ او بل چاته مو لمن ونیوله، هغوی ناسته دقطر هېواد ته ولېږدوله؛ نه دچا نفوذ پرې اثر وکړ، نه دچا اوامرو ته خم شول
ته هم د افغانیت دعوه لرې، افغان شه او محض دومره جرأت وکړه چې د وړمې ورځې برید وغنده
ته او ستا ټوله اداره امریکایانو ته د یوې ټنګې ارزښت نه لري، نه ټوله اداره کې داسې څوک درسره شته دی چې له امریکایانو حتی دخپل ځان پوښتنه وکړي
ته او ستا ټول چارواکي دوه تابعیتونه لري، اولادونه او کورنۍ ئې خارج کې مېشت دي او د افغانانو په بیت المال دډانس کلپونو چکرې وهي؛ که ستا مخالفین کویټه کې په پټه مېشتېدا پنحابیان ګرځي، نو تاسې چې غرب کې بلډبنګونه، تجارتونه، او بانکي حسابونه لرئ، څوک یاست؟!
مخکې تر هغې چې له طالبانو دمذاکراتي ناستې غوښتنه وکړې لومړی خپل هویت ثابت کړه چې ته څوک یې؟!
