کندهار: د کرکټ لوبغاړو لپاره د ۲۴ ميليون افغانيو په ارزښت مېلمستون جوړيږي
(کابل ټکی کام، ۱۳۹۸، وری ۱۵)
د افغانستان کرکټ بورډ وايي، کندهار ولايت کې د هند سفارت په مالي لګښت د کرکټ لوبغاړو لپاره مهجز مېلمستون جوړيږي.
تيره ورځ د کرکټ بورډ د مشرتابه او د اقتصاد وزارت د استازو په ګډون په دغه ولايت کې د ياد مېلمستون د بنسټ ډبره کېښودل شوه.
په دغه مېلمستون څلورويشت ميليون افغانۍ لګښت راځي چې ټول لګښتونه يې د هندوستان سفارت په غاړه اخيستي دي.
کرکټ بورډ وايي، دغه مېلمستون به د شپاړلس مياشتو په موده ې بشپړ شي چې ټولټال به پکې د اوسیدو خونو تر څنګ یوه کنفرانس خونه هم ولري.
د کرکټ بورډ مشر عزيزالله فضلي او د دغه ولايت چارواکو د پرانيست غونډې په مراسمو کې د هند له سفارت او اقتصاد وزارت څخه مننه وکړه چې د ياد مېلمستون لګښت او د څارنې مسؤوليت يې په غاړه اخيستی او د کرکټ لوبغاړو لپاره د اسانتياوو برابرولو هڅې کوي.
