کرکټ نړيوال جام: افغانستان په پرله پسې ډول خپله اتمه لوبه هم وبايلله
(کابل ټکی کام، ۱۳۹۸، چنګاښ )
د افغانستان کرکټ ملي لوبډلې د نړيوال جام سياليو په لړ کې خپله اتمه لوبه هم د پاکستان پر وړاندې وبايلله.
د لوبې پچه افغان لوبډلې وګټله او لومړی يې د توپ وهنې پريکړه وکړه چې په ټاکلو پنځوس اورونو کې يې د نهه لوبغاړو په سوځيدو ۲۲۷ منډې جوړې او پاکستان ته يې د ۲۲۸ منډو هدف وټاکه.
په افغان توپ وهونکو کې تر ټولو زياتې ۴۲-۴۲ منډې اصغرافغان او نجيب ځدران او ورپسې رحمت شاه ۳۵ منډې جوړې کړې.
دغه راز په افغان توپ اچوونکو کې مجيب الرحمن او محمد نبي د پاکستان دوه- دوه او راشدخان یو لوبغاړی وسوځاوه.
پاکستان د خپل وروستي اور په څلورم توپ د افغانستان ورکړل شوی هدف پوره او لوبه يې په خپل نوم کړه.
افغانستان تر دې دمه په نړيوال جام سياليو کې اته لوبې ترسره کړي او ټولې يې بايللي دي.
د کرکټ بورډ د معلوماتو له مخې، افغانستان د نړيوال جام په سياليو کې خپله وروستۍ لوبه له ويسټ انډيز سره کوي.
