کابل ټکی کام ۲۱وږی/۱۳۹۴
راپور: انصار
د سعودي عربستان د ملکي دفاع ادارې په یوه ټوېټر پاڼه کې ویلي دي چې د حج د مراسمو په دوران کې د ودانۍ یو کراین را لوېدلی، او ۱۰۷ تنه حاجیان د شهادت لوړ مقام ته رسېدلي دي.
د سعودي ملکي دفاع ادارې په خپله ټوېټر پاڼه کې لیکلي چې د سخت باران او د شګو د طوفان له کبله د ودانیو جوړولو لوړ کراین په مسجدالحرام را ولوېدو.
او د یادو شهیدانو تر څنګ ۲۳۰ تنه ژوبل شوي هم دي چې د سعودي مرستندویه پولیسو روغتون ته رسولي دي.
د سعودي عربستان څخه په راپورونو کې ویل شوي چې د نورو ورځو په نسبت پرون د جمعې په ورځ په مسجد الحرام کې په زیات شمېر حاجیانو لمونځ اداء کاوو چې د باد او بارانونو د طوفان له کبله د کراین د را پرېوتو پېښه را منځته شوه.
د اټکل لمخې سږنی کال به تر دوه نیم میلیونو پورې د بېلابېلو هېوادونو څخه ورغلي مسلمانان د حج د فریضې په اداء کولو کې برخه واخلي.
په ۲۰۱۲م کال کې سعودي ته د ورغلو حاجیانو شمېر تر درې میلیونو رسېدلی وو چې بیا د سعودي امنیتي ادارې د ځینو ستونزو د را کمولو لپاره د حاجیانو شمېر کې کمښت راووست.
د یادونې وړ ده چې په ۲۰۰۶م کال کې د حاجیانو د زیات موجودیت او د حج په مراسمو کې د ستونزو له امله ۳۵۰ تنه حاجیان شهیدان شوي وو.
