مونږ ولې مات یو؟
لیکنه: زید نیکمل
ځینې خلک او په ځانګړي ډول د غربي میډیا او افکارو څخه اغېزمن ځوانان دا فکر کوي چې زمونږ د نه پرمختګ اصلي سبب اسلام دی مګر هیڅکله داسې نه ده بلکې زمونږ د نه پرمختګ اصلي سبب د اسلام څخه لرې والی،د اسلام څخه زمونږ مخ اړونه او د الله په لار کې جهاد نه کول دي، ځکه خو به عمر بن الخطاب رضي الله عنه فرمایل چې مونږ هغه څوک یو چې الله تعالی په اسلام سره عزت را کړی او که چېرته مونږ عزت د اسلام نه بغیر بل چېرته ولټوو نو الله تعالی به مونږ ذلیل کړي.
د رسول الله صلی الله علیه وسلم د وفات څخه وروسته د اسلام غازیانو د دوه لسیزو په دوران کې دوه داسې سترې امپراتورۍ(قیصر او کسرا) ماتې کړي لکه د نن عصر روس او امریکا،د اسلام د غازیانو د غالب کېدو سبب دا نه و چې د دوي شمېر به په کومه جګړه کې زیات و او نه هم د قیصر او کسرا په جنګونو داسې جنګ راغلی چې د مسلمانانو شمېر زیات وي بلکې د مسلمانانو د غالب کېدو اصلي سبب په الله تعالی پوخ یقین او د اسلام په ټولو احکامو عمل کول وه.
مسلمانانو د تاریخ په اوږدو کې یوازې سیمې نه دي فتح کړي بلکې هره سیمه کې چې نیولې هلته یې د لویو لویو ښارونو بنسټونه ایښي دي،کله چې مسلمانانو عراق ونیو نو هلته یې د بصري ښایسته ښار ودان کړ همدارنګه د سیمو د نیولو وروسته به یې په ځانګړي ډول ابادۍ ته پاملرنه کوله.
د عباسي خلافت په دوران کې د بغداد ښار د نړۍ د مشهورو ښارونو څخه و د هر علم ماهرین په دې ښار کې موجود و او یو داسې مشهور کتابتون یې هم درلود چې په زرګونو کتابونه په کې وه،اروپایان به د علم د تحصیل لپاره بغداد ته راتلل او له دې ځایه به یې اروپا ته لېږدوه همدارنګه اندلس چې د مسلمانانو په واک کې و نو هلته داسې کورونه ډېر کم وه چې کتابتون به یې نه درلود.په هغه وخت کې د اسلام په سبب اسلامي نړۍ دومره پرمختګ کړی و چې اروپایانو به له مسلمانانو څخه علم داسې غوښته لکه څوک چې چا نه خیرات غواړي.
کله چې د اندلس د مسلمانانو او فرانسي د لښکرو ترمنځ مشهوره جګړه وشوه او مسلمانانو سخته ماتې وخوړه او بېرته اندلس ته را ګرځېدل نو وروسته د فرانسي یو نامتو مؤرخ د دې جګړې ارمان کړی او ویلي دي کاشکي مونږ په هغه جګړه کې ماته خوړلي وای او مسلمانان راغلي وی او زمونږ سیمې راته د نیولو وروسته سمې ابادي کړي وی اوس به مونږ د نورې اروپا څخه څو پیړۍ زیات پرمختګ کړی وی.نن چې کفار په مونږ باندې ظلمونه کوي همدا سبب دی چې مونږ د اسلام سره واټن پیدا کړی دی؛نن محمدبن قاسم او صلاح الدین ایوبي ته انتظار بې عقلي ده مونږ باید د اسلام د سپیڅلو مشرانو لاره تعقیب کړو او خپل ځانونه په اسلامي فکر او عقیدې سمبال کړو او د اسلامي نظام دقیام لپاره نهایې کوښښ وکړو تر څو د الله تعالی په ځمکه د الله قانون پلی شي او د دنیا مخ د ظلمونو او وحشتونو څخه خلاص شي.
