« تبصره »
په افغانستان کې د سولې او امن را وستلو لپاره په تېرو دوه نيمو مياشتوکې دا دی په کابل کې څلورمه څلور اړخيزه غونډه دايره شوه چې د اسيا زړه له کنفرانسه ورسته يې نږدې دوه نيمي مياشتې وشوې په دې څلورو غونډو کې په دې ټينګار کېږي ، چې ددولت او طالبانو ترمنځ د مذاکراتو لپاره زمينه برابره شي.
په تېرو دريو غونډوکې چې څرنګه طالب مشران د افغان دولت مذاکراتي ټيم سره خبرو ته امده کړل شي په دې نقشه کې کار ر وان و، په څلورمه غونډه کې د ملي يوالي دحکومت څخه اعلان شوه چې ددولت د نماينده ګانواو طالب مشرانو ترمنځ به د مذاکراتو د نيټې او ځای په اړه خبرې وشي چې دولت د څلورمې( کابل کې دايرې شوې) غونډې ته زيات خوشبين دی، وايي: د څلورمې غونډې خبرې به ښې پايلې ولري .
د مخه به افغان چارواکو پر پاکستان نيوکې کولې چې دسولې په اړه پاکستاني چارواکي اخلاص نه لري خو اوس دپاکستان هلو ځلو افغاني چارواکي هم قانع کړل، چې دسولې په اړه دتېر په نسبت زياتې هلي ځلې کوي د افغاني چاروا کو يوه نيوکه پر اسلام آباد دا وه چې په طالب وسلوالو مشرانو اسلام آباد اثرلري او سولې ته دې کينوي ، چې اسلام آباد په تېرو کلونو کې هم د کابل د نيوکو په مقابل کې خپل ځواب و يلی دی. حقيقت دادی چې اسلام آباد په طالب مشرانو سولې ته دکينولو يوڅه اثرولري خو دومره اثرنه چې څه اسلام آباد غواړي هغه نظرته دی طالب مشران مجبورکړي طالبان به خپل نظر او دسولې په اړه ازاد دي دهېڅ چا داغيزاواثرلاندی کړنې نه کوي، که طالبان ازاد نه وي؛ نو د ګاونډيانو په بيا بيا غوښتنو به يې سوله کړې وای ، دافغانستان په سوله او امن کې دګاونډيانو سوله او امن راتلالی شي.
که د سولې او امن خبره په ژور نظروګورو په حقيقت کې د ملي يوالي چارواکې ازاد نه دي او نه خپل نظر څرګندولی شي .
افغان چارواکي به د طالبانوسره د سولې په اړه هغه څه وايي، کوم چې ورته امريکا ويلي وي ځ؛ که د ملې يوالي حکومت دامريکا د بهرنيو چارو د وزير جان کېري لخوا جوړشوی دی،او طالبانو خپل سياسي د فتر په خپلو کې د يوې شور ا له مخې جوړکړی دی.
طالبان چې دلومړي سرنه کوم دريځ لري په هغه دريځ ولاړدي.
که داسلام آباد يا کوم بل هېواد اثر پرې وای له وخته به يې دريځ څه چې دريځو نه بدل کړي وای .
د افغانستان دسولې په اړه اسلام آباد دپخوا په نسبت خپلې هڅې ګړندۍ کړي دي او هم چين غواړي ؛ نوره دا فغانستان جګړه پای ته ورسېږي. د پاکستان د پوځ سر لښکر د قطر له چار واکو علاوه د طالب مشرانو سره د ليدنې لپاره قطر ته سفرکړی دی،تر څو دسولې په کولو سره يوازي افغانستان نه؛ بلکې پاکستان نور ګاونډي هېوادونه او سيمه د جګړې له اوره وژغورل شي.
افغان ولس هيله لري، چې افغاني چارواکي نور که په بشپړه توګه نه وي يو څه خپلواکي ولري او طالب مشران هم بايد دافغان ولس د ګټو په خاطر چې اسلامي اصول او افغانيت ته پکې درناوی وي يوڅه نرموالی وکړي.
