کابل ټکی کام (چهارشنبه، ۴ تله، ۱۴۰۳ل)
په داسې حال کې، چې د حزب الله مقاومتي غورځنګ او صهیونیستي ريژیم ترمنځ ترینګلتیا مخ په پراخېدو ده. اسرائیلي ورځپاڼې “هارتز ینیټ” خبر ورکړی، چې په لومړي ځل د حزب الله توغندي تل ابیب ته رسیدلي دي.
یاده ورځپاڼه، چې د اسرائیلو یو له مهمو او پخوانیو رسنیو ګڼل کېږي په خپل راپور کې کاږي: حزب الله غورځنګ د لبنان له جنوب څخه د اسرائیلو پر پلازمینې تل ابیب ګڼ شمېر بالستیک توغندي ویشتلي، چې له ډلې یې ګڼ د دفاعي سیستم له لوري په هوا کې له کاره لوېدلي؛ خو ځینې یې لګیدلي او موټرو او ودانیو ته یې زیانونه اړولې دي.
د یادونې وړ ده، چې تر دې وړاندې حزب الله غورځنګ ادعا کړې وه، چې په تل ابیب کې یې د صهیونیستي ريژیم د څارګرې ادارې مرکزي دفتر په نښه کړی دی. د کارپوهانو په اند په تل ابیب د حزب الله وروستیو ګذارونو وښودله، چې یاده ډله دا وړتیا لري، چې د اسرائیلو هر ښار کې خپل اهداف په نښه کړي.
