اوښکو ! دا زما او زړه خبره وه

شاعر/محمدانور « تبسم »

ژمن يمه الفاظ به د شر نه وايم
نور به دې باڼو ته خنجر نه وايم

وروځې دې ليندې او کمان نه بولم

سترګو ته دې ياره! سنګر نه وايم

حسن ته بدرنګ تشبهات څه معنا ؟
زه خو دي هنر ته،هنر نه وايم

خيال چې پکې نه وي،د انسان د خير
کاڼي د سخرا ته خو سر نه وايم

جنګ دى،وينې،وينې دى ماضي زما
تورو،تورو شپو ته سخر نه وايم

زړه،قرار شه!ستا کيسه په ما شوله
وايم ورته وايم،خو زر نه وايم

زه څله په بل سترګې خوږې کړمه؟
زه جمات ته چيرې مندر نه وايم

اوښکو ! دا زما او زړه خبره وه
زه د کور خبره،بهر نه وايم

ژوند لمبه،لمبه دى،تبسم پکې
ځان ته خليل وايم،ازر نه وايم