تېره ورځ د ترکيې د بهرنيو چارو وزير د خپل پارلمان په بیړنۍ غونډه کې داسې پرېکړه اعلان کړه، چې نه يوازې د ترکيې د ولس غوښتنه وه، بلکې د اسلامي نړۍ د خلکو له زړونو سره يې همغږي درلوده. نوموړي څرګنده کړه، چې د غزې د مظلوم ملت په ملاتړ به له صهيونيستي رژيم سره هر ډول سوداګري بندېږي، د ترکيې له بندرونو څخه به هېڅ بيړۍ د اسراییلو پر لور نه ځي، او د ترکيې هوايي حريم به د اشغالګرو د الوتکو پر مخ تړلی وي. دا یو زړور او تاریخي ګام دی، چې نړۍ ته د ترکیې د سیاست روښانه پیغام ورکوي، چې د حق ملاتړ د معاملاتو قرباني کېدلی نشي.
د بهرنيو چارو وزير په ډاګه کړه، چې د صهيونيستي رژيم ګواښ يوازې د فلسطيني ملت پر وړاندې نه دی، بلکې د سيمې د ټولو هېوادونو ته متوجه دی. دا خبره يو ستر حقيقت ته اشاره کوي؛ ځکه چې د غزې جګړه یوازې د یوې سیمې موضوع نه ده، بلکې د ټول اسلامي امت، او حتا د بشریت د وجدان امتحان دی.
داسې ښکاري چې نن ورځ اسلامي نړۍ د یوې سترې ازموینې په درشل ولاړه ده. د ترکیې پرېکنده دریځ اسلامي هېوادونو ته عملي درس ورکوي. که اسلامي هېوادونه د ظلم پر وړاندې ګډ او واحد دریځ غوره نه کړي، خدای مه کړه سبا به د هغوی د خاورو او ملتونو د وینو وار وي. تاریخ شاهد دی چې صهیونيستي رژیم یوازې پر یوه ملت بسنه نه کوي، بلکې د پراختیا غوښتنې خوبونه یې د ټوله سیمې د ناارامه کولو هڅې دي.
له همدې کبله، د ترکیې اقدام باید یوازې د ستاینې وړ نه وي، بلکې د عملي همکارۍ پیل هم وګرځي. ټول اسلامي هېوادونه، په ځانګړي ډول عربي هېوادونه، باید په ګډه ددې اشغالګر رژیم د ظلمونو پر وړاندې دریځ ونیسي، اقتصادي اړیکې پرې کړي، سفارتي فشار زیات کړي او په نړیوالو سازمانونو کې د فلسطین د ملت د ملاتړ غږ پورته کړي.
نن ورځ د فلسطین قضیه یوازې د فلسطینیانو نه، بلکې د اسلامي امت عزت او د انسانیت وجدان دی. هره شېبه ځنډ د بېګناه ماشومانو، مېرمنو او سپینږیرو د وینو بهېدو په مانا دی. اسلامي نړۍ باید له ترکیې څخه الهام واخلي او په ګډه د اشغالګرو پر وړاندې ودرېږي. که نن پرېکنده ګام پورته نشي، سبا به ډېر ناوخته وي.
