ډاکټر آصف
په ولسي جرګه کې د تېرې شنبې په ورځ په عمومي غونډه کې د جرګې مشر عبدالروف ابراهیمی وویل چې د ګومل پېښه زړه بوږنوونکې ده او امنیتي بنسټونه به د کورني امنېت له کمېسون سره په ګډه د دغې پېښې په اړه څېړنه وکړي، ده وویل: زمونږ د معلوماتو له مخې په ګومل کې هغه کسان وژل شوي دي چې د نظام ملاتړ یی په خپله وسله کاوه!!!
همدا راز غونډې ته د پکتېکا استازي حاجی عبدالقدیر هم وېلي دي چې په ګومل کې هغه ځوانان او قومي مشران وژل شوي دي چې د حکومت ملاتړ ېې کولو!!!
د امریکا د دې ایجنټانو د دې څرګندونو په اورریدو سره د انسان ذهن ته دا لنډۍ ورپه یاد شي چی:
د لیونۍ آرمان پوره شو
په لاره ځي په کاڼو ولي زیارتونه.
په دی معنی چې نن امریکایی ځواکونه خپلو اهدافو ته رسيدلی نو ځکه یې د همغه چا په وژلو پیل کړی دی چی چا دوی ته د راتلو زمینه برابره کړی وه او تر ننه یې ملاتړي دي، نو اوس چی د امریکایانو آرمان پوره شو نو ځکه دغه زیارتونه په کاڼو ولي او دا سلسله به دوام پیدا کړي.
ټول ملت او نړیوال د ۱۵ کلونو راهیسی په جریان کی دی چی په افغانستان کې بهرني ځواکونه په مسلسل ډول د ملکي وګړو په وژلو بوخت و، لا هم دی او لا به هم وي. نو ځکه د پکتیکا په ګومل کې د ۱۶ تنو ملکي وګړو وژنه کومه تصادفي پیښه نده بلکې د همغې سلسلې یوه کړۍ ده چې د ۱۵ کلونو راهیسې پېل شوې او روانه ده او تر هغې به روانه وي چې تر څو پورې ملت پخپله یو موټی شوی نه وي او په یو غښتلي ملی قیام لاس پورې نکړي.
زمونږ د دې ادعا چې (دا کومه تصادفي پیښه نده) دلیل دا دی چی امریکا او متحدینو یې تل دا دعوه کړېده چې د دوي ځواکونه په داسی ماډرنو تخنیکی وسایلو سنبال دي چې د هوا د خورا لرې ارتفاع نه د ځمکې په سر یو انچ شی هم په دقیق ډول کتلی ، څارلی او له مینځه وړلی شي. نو اوس پوښتنه ځان په خپله مطرح کوي چې څنګه دې وحشی صفته ځواکونو ته ډک موټر قومي مشران نه ښکاري او بی موجبه پرې بمونه غورځوی؟
نړیوال پدې ښه پوهیږي چې دغه ډول کړنې عمدي کړنې دي خو څه وشي چې د زورور اوبه مخ په پورته ځي، نو دا چې امریکا ځان په نړۍ کې د یو نړیوال ښکیلاک او زبرځواک په حیث وړاندې کړی نو ځکه یې مقابل ته د ودرېدو هیڅوک زړه نه ښه کوي په همدې وجه ځکه نړیوالو ته د افغانانو دا ډول وژل کیدل هیڅ ډول کوم اهمیت نه لري او ټول پرې د چوپې خولې موقف اختیاروي.
ویل کیږی چی کرزی لالا هم د پخوا په څیر یو ځل بیا دغه ډول برید وغانده او دا یې یو ناروا برید وګڼلو او یو ځل بیا یې تهدید وکړ چی د بهرنیو ځواکونو دغه ډول غیر مسولانه بریدونه ښه عواقب نلری، او دوام به یی د بهرنیانون پر ضد د افغانانو کلک غبرګونونه راوپاروی، هغه په شوی زیان اندیښنه هم ښودلی ده!!!
د کرزی دغه راز مسخره آمیزه څرګندوني هم د هغه یو معمول جوړی شوی چې د ملت درد نشي دوا کولی، هغه یواځی په همدې یو څو غوړو خبرو کولو د د ملت نه د ځان خلاصولو هڅه کوي، په داسی حال کی چې ملت په دی ښه پوهیږی چې دغه وحشی صفته بهرنیان همدی دلالانو راوستي دي او ملت به یوه ورځ د همدې دلالانو ګریوان ته په لاس اچولو مجبور شي.
له بلې خوا دا وژنې د جان کیري لخوا افغانانو ته یوه ډالۍ هم ده چی له ځان سره یی راوړه او د دې معنی داده چی افغانانو ته وښیي چې نور نو د مخالفینو پر وژنو برسیره د خپلو متحدینو وژنو ته هم دوام ورکوي. ځکه چې د لیونۍ آرمان پوره شوه، په لاره ځي په کاڼو ولي زیارتونه.
