هېواد خوږیاڼی
امریکا په تېرو پنځلس کلونو کې په افغانستان کې بې شمېره سرغړونې کړي او کوي یې. امریکا دلته زرګونه افغانان شهیدان کړي، ټپیان کړي، کورونه یې وران کړي، خلک یې بندیان کړي او د ظلمونو، وژنو او شکنجو لړۍ تراوسه روانه ده.
امریکا په تېرو پنځلس کلونو کې د افغانستان په ټول ولایتونو، په ځانګړې ډول په پښتونو ولایتونو کې زرګونه خلک له تېغه تېر کړل؛ خو تراوسه پورې یو امریکايي عسکر هم محاکمه نشو، بلکې ټول مجرم امریکايي عسکر سرې سترګې له افغانستانه ووتل.
تېر کال په کندوز کې د بې پوله ډاکټرانو پر روغتون بمبار وشو، چې له امله یې شل ډاکټران شهیدان او نور ټپیان شول. د امریکا پلټونکې ادارې سیګار په خپل راپور کې ویلي دي، چې امریکايي عسکر ستومانه شوي وو، ځکه یې پر روغتون بمبار وکړ.
ددې پرځای چې امریکا په خپل کړي جرم اعتراف وکړي، دغه بمبار ته یې دلایل وتراشل او خپل عسکر یې له جرم څخه مبراء کړل. افغان دولت تراوسه د امریکا له لوري په خپاره شوي راپور هېڅ ډول غبرګون نه دی ښودلی او نه یې د امریکايي عسکرو له لوري دغه جرم وغانده.
امریکايي عسکرو له دې وړاندې هم په ودونو، جنازو، مسجدونو، ښارونو او کلیو بمباري کړې؛ خو هرې بمبارۍ ته خپل دلایل تراشي او خپل عسکر د مجرم کېدو څخه ساتي.
اوسنی ګډحکومت د امریکا پروړاندې بیخي غلی دی او د امریکا هر ډول وحشت او رزالت باندې هېڅ غږ نه پورته کوي. اوسنی ګډحکومت باید د امریکې له لوري د کندوز پر روغتون د شوي بمبار په اړه له امریکايي چارواکو څخه وضاحت وغواړي، کنه حالت به یې له دې نور هم خراب شي.
د بې پولې ډاکټرانو ټولنې ته هم پکار ده، چې دغه مسله همداسې پرېنږدي او خپل غږ دې د نړۍ ګوټ ګوټ ته ورسوي او د ورسره شوي ظلم په اړه دې خپل غږ پورته کړي.
