لیکنه / هېواد خوږیاڼی
په څرخي پله زندان کې شپږ تنه بندیان چې د طالبانو سره د همکارۍ په تور نیول شوي وو، اعدام شول.
د ګډحکومت مشر اشرف غني ملي شورا ته په خپله وینا کې ژمنه کړې وه، چې ځینې طالب بندیان به اعدام کړي او دغه ژمنه یې پوره کړه.
د ګډحکومت مشرانو دغه اقدام وروسته له هغه وکړ، چې طالبانو د ملي امنیت پر لسم ریاست برید وکړ او له سلو ډېر یې ووژل او لسګونه نور یې ټپیان کړل.
له دې وړاندې د بښنې نړیوال سازمان هم له افغان دولته غوښتي وو، چې د اعدام سزا دې نه پلي کوي؛ ځکه افغان دولت کې فساد ډېر دی او کېدای شي ځینې بې ګناه کسان هم پکې اعدام شي؛ خو نن شپږ تنه بندیان اعدام شول او اشرف غني ملت ته په لومړۍ ژمنه کې بریالی شو.
دا چې د رجال برجسته پر ریاست برید کې ډېری پنجشریان ووژل شول، نو هغوی غچ له دې بې ګناه بندیانو واخېست او کېدای شي دغه لومړۍ او وروستۍ اعدام نه وي او دغه لړۍ نوره هم ګړندۍ شي.
افغان دولت په داسې وخت کې د طالب بندیانو د داعدام حکم عملي کړ، چې د سولې څلور اړخیزه ناسته هم ترسره کېږي او داسې ویل کېږي، چې طالبان به په دې غونډه کې ګډون وکړي.
طالبانو له دې وړاندې هم ویلي وو، که افغان دولت یې ملګري اعدام کړي، نو دوی به هم ورته اقدام وکړي او هغه قاضیان به خپل هدف وګرځوي، کوم چې د دوی په ملګرو د اعدام سزا پلي کوي.
د افغان دولت ددې بېړنۍ پرېکړې وروسته کېدای شي په ټول هېواد کې د طالبانو حملې زیاتې شي او قاضیان او څارنوالان په نښه کړي.
اعدامونه به د طالبانو روحیه کمزورې نه کړي، بلکې د غچ اخېستنې اور ته به پوکي ورکړي او سولې ته شته هیلې به له خاورو سره خاورې کړي.
افغان دولت ته پکار ده، چې د اعدام سزا دې ودروي او نور کسان دې اعدام نه کړي، کنه د طالب راتلونکی ګوزار به د ارګ دروازې وټکوي.
