سرلیکنه
دکندوز په ښار کې یوځل بیا په ښاریانو ویره ناسته ده، چې د کندوز ولایت چار چاپیره طالبان پراته دي او که هر وخت وغواړي دکندوز ښار بیا نیولی شي او هغو اربکیانو او پولیسو، چې په تیرځل ېې پر ملکي وګړو خوا نه وه سړه شوې اوس ېې د چور تالان لپاره بیا پړي او توپکونه پر اوږو کړي دي.
اته میاشتې وشوې، چې دکندوز ښاریان ذهني محاصره دي، ځايي پولیسو خبر ورکړی که د کندوز له ښار څخه څوک بهر ووتل او هر څه ورسر ه وشول ذمه واري ېې خپله ده، تر څه حده د پولیسو وینا پرځای ده، چې دکندوز خواوشا ټول طالبان راټول شوي، خو امنیتي ځواکونه دا وس او توان په ځان کې نه ګوري، چې دکندوز ښار د طالبانو له محاصرې او ښاریان له ذهني محاصرې وژغوري.
د کندوز ښاریان پر امنیتي مسئولینو نیوکه لري او وايي: د کندوز امنیتي چارواکي، چې تیرځل ېې د طالبانو د برید ځواب ونه ویلو، ښار ېې له لاسه ورکړو، اوس هم هغه طالبان د کندوز له ښار څخه راچاپیر شوي دمقابلې توان ېې نه لري او بله داچې امنیتي ځواکونه په خپل پلان کې دکندوز ښار د محاصرې ماتولو هیڅ برنامه نه لر ي .
تیر ځل چې دکندوز ښار د طالبانو لخوا نیول کیدلو، په کندوز کې د امنیتی ځواکونو شمیر تر ۷۰۰۰پورې رسیدلو، خو دا مهال د امنیتي ځوکونو شمیر تر۷۰۰۰ کم شوی دی، امنیتي ځواکونه نه یواځې داچې دکندوز د ښار په دفاع کې بې باوره دي، بلکې کندوز ته د ورغلیو لویو لارو ساتنه هم نه شي کولای.
د کندوز امنیتي چارواکو ددې ولایت ښاریانو ته خبر ورکړی او ویلي یې دي: که هر څوک له ښار څخه بهر ووتل او ووژل شول، مسئولیت ېې په خپله غاړه دی.
په همدې ویناسره د کندوز ښاریان په درې ډوله محاصره دي:
یو د امنیتي ځواکونو محاصره ده، چې له ښار څخه بهر ېې نه پریږدي. دویم د طالبانو فیزیکي محاصره ده، چې دښار پنځه کیلومترۍ کې ېې پوستې جوړې کړي او د کندوز امنیتي چارواکي ېې دمقابلې توان نه لري .
درېیم دکندوز ښاریان په ذهني توګه دطالبانو لخوا محاصره دي او هر وخت ددې انتظار باسي، چې دتېر په څېر به طالبان یوځل بیا پر کندوز برید کوي، محلي پولیس او اربکیان به په چور چپاول بیا پیل کوي او د ناټو وحشي الوتکې به پرې ړنده بمباري کوي.
د کندوز ښاریان له هغه وسلوالو څخه سر ټکوي، چې د نظامیانو په لباس کې د خلکو کورونوته ورځي او څه اسباب او ګاڼه ېې چې زړه وغواړي، هغه له ځانه سره وړي. په څو څو واره دکندز د ښار خواو شا اوسیدونکو امنیتي چارواکوته د دا ډول چور او چپاول شکایتونه کړي دي، خو کوم مثبت ځواب ورته نه دی ورکړل شوی.
