څوارلسمه برخه
په تېر پسې….
«ملکي مورې! تاسو هرومرو د خپل ځان د خوندي ساتلو انتظام وکړئ» نګو ځواب ورکړ. خو په دې ډول نه، بلکه تاسې ددې سازش په اړه سلطان هم خبر کړئ، هغه به پخپله ددې هر څه لپاره مناسب انتظام وکړي.
فاطمې بیګمې په اندیښمن ډول وویل: «او که چیرې د سلطان په راتلو کې ځنډ راشي، نو معلومه نده چې دا بدبختان به تر هغه وخته پورې څه څه و نکړي، او زه به یې څه ډول سنبال کړم ….»
«ملکې مورې! ته ډاډه اوسه.» نګو ورته تسلي ورکړه، «لا تر اوسه د هغې ظالمانو سازش مکمل شوی ندی، لا تر اوسه هغوی د راج محل د رانیانو سره خبرې کوي، تر هغې چې دهغوی خبرې د عمل مرحلې ته رسیږي نو معظم سلطان به هم دهغوی په خلاف کوم تدبیر جوړ کړی وي.»
«ډیره ښه، زه به اوس لږ څه وکړم.» فاطمې بیګمې د خپل محل د داروغې پسي خپله کنیزه ور ولیږله.
«ډیره ښه ملکې مورې! اوس ماته اجازه راکړئ» نګو راپورته شوه« خدای دې تاسې په خپل امن کې ولري»
«دا ته څه وایې، بې عقلې!» فاطمې بیګمي هغه ته په زغرده وکتل «اوس خو زه تا بیرته هغو ظالمانو ته نه ورسپارم.»
«ملکې مورې! » نګو ورته په پوره ډاډ سره وویل: « زما بیرته ستنیدل ډیر ضروري دي، که چیرې زه بیرته ستنه نشم نو دا خبره به ډاګیزه شي او بیا به نورې ستونزې راپیدا شی. » نګو په ډیرې سختۍ سره ملکه مور په دې و پوهوله او هغه هم دخبرې په حساسیت و پوهیده.
د نګو ددې اطلاع په اساس ملکې مور خپل یو ګړندی قاصد د سلطان په لور ور ولیږه او سلطان ددې خبرې د خبریدو سره سم محمدعلي کمیدان دارالسلطنت سرنګاپټم ته د حالاتو د سمیدو په خاطر راولیږه.
محمد علي کمیدان د بنګلور له لارې سرنګاپټم ته نژدې را ورسید او د خپل فوځي ټولي سره یې هلته په «کړي ګټه» کي خیمه ووهله. هلته یې مشهوره کړه چې هغه د «ګرګ» څخه د تیریدو وروسته د حیدرنګر په لور روان دې ځکه هلته حالات کړکیچن شوي دي.
کړي ګټه، د سرنګاپتم څخه یوازې څو میله واټن درلود، د هغه ځایه یې د خپل یوه قاصد په لاسو د سرنګاپټم قلعدار ته یو لیک ورولیږه، په هغه لیک کې یې غوښتنه کړې وه چې څرنګه چې هغه د کرګ له لارې حیدرنګر ته روان دی، نو په دې خاطر که چیرې قلعدار اجازه ورکړي نو د یوې شپې لپاره به د خپلو کوچنیانو سره د پاته کیدو په خاطر هلته ورشي.
کله چې قاصد د محمدعلي کمیدان د لیک سره یو ځای قلعدار ته ورغی، نو اتفاقا ستر شامیان هم هلته د هغه سره ناست وو. قلعدار د لیک د لوستو نه وروسته قاصد د انتظار کولو لپاره بیرون ولیږه او پخپله یې د ستر شامیان سره په دې اړه سلا مشوره پیل کړه.
قلعدار خپل آند ډاګیزه کړ.
شامیان! د حیدرنګر په لور د سردار محمدعلي کمیدان د ورتلو څخه مقصد دادی چې لا تر اوسه زمونږ د منصوبې او پلان په اړه چاته د یوه ویښته په اندازه هم معلومات نشته. سلطان او د هغه حواریون په خپلو خپلو کارونو کې مصروف دي»
ستر شامیان په قهقهه خندا سره په لوړ اواز وویل: « بهادره قلعداره! هغه به څه ډول منصوبه وي چې راز یې څرګند شی. مونږ په دومره پټه توګه خپل پروګرام پیل کړی دی چې یو غوږ په بل غوږ خبر ندی. » بیا نو ستا څه فکر دی؟ قلعدار د شامیان څخه وپوښتل : «محمدعلي کمیدان ته به کلا ته د یوې شپې د راتلو اجازه ورکړو. په دې کې خو کوم حرج نه شته؟
«او صاحبه، دا هم د پوښتنې خبره ده؟ » شامیان ورته وویل: محمدعلي کمیدان ته په کلا کې د یوې شپې د تیرولو اجازه باید ورکړل شي، دا خو به زمونږ د منصوبې لپاره نوره هم ګټوره ثابته شي. که چیرې تر دې وخته پورې چاته زمونږ په نیتونو شک هم وي د محمدعلي کمیدان په راتلو او په کلا کې د شپې په تیرولو به هغه هم له منځه ولاړ شی.
نور بیا……..
