دلمونځ مسایل (دوه ویشتمه برخه)

لیکوال: م، نجم الرحمن (فضلی)

 د لمانځه د شرطونو او رکنونو بيان

دا چې د لمانځه اهتمام تر ټولو عبادتونو زيات دى نو له همدې امله شرطونه يې هم ډير دي، دلته يوازې د هغو شرطونو بيان کيژي کومو ته چې په هر لمانځه کې ضرورت دى، يو شمر شرطونه کوم چې له يو شمير ځانګړيو لمنځونو سره تعلق لري لکه د جمعې د لمانځه شرطونه د هغو بيان به په هغه ځاى کې وکړى شي چيرته چې د همدغه لمانځه ذکر کيژي.

له لمانځه نه دمخه د کومو شيانو کول ضروري دي

پوښتنه : له لمانځه نه مخکې د کومو شيانو کول ضروري دي؟

ځواب : له لمانځه نه مخکې د اوه (۷) شيانو کول ضروري دي، له کومو پرته چې لمونځ نه کيږي، همدغو شيانو ته شرائط او فرض ويل کيږي.

هغه اوه شيان کوم دي

پوښتنه : هغه اوه شيان د کومو چې له لمانځه نه مخکې کول ضروري دي کوم کوم دي؟

ځواب : هغه اوه شيان دا دي.

(۱) د بدن پاکوالی.

(۲) د کاليو ( جامو) پاکوالی.

(۳) د ځای پاکوالی.

(۴) د عورت پټول.

(۵) د لمانځه وخت پيژندل.

(۶) قبلې ته مخ کول.

(۷) نيت کول.

د لمانځه د لومړي شرط بيان

د لمونځ کونکي بدن له نجاست حقيقي نه پاک پکار دى، هغه که غليضه وي که خفيفه وي، مرئيه وي که غير مرئيه وي، هو ! که چيرته د معافي په اندازه وي بيا څه خبره نشته، مګر بهتره دا ده چې له هغه څخه هم پاک وي، همدا ډول د حکمي نجاست له دواړو ډولونو (حدث اکبر او حدث اصغر) څخه هم پاک پکار دى ([1]).

د بدن له پاکوالي څه مراد دى

پوښتنه : د بدن له پاکوالي څخه څه مراد دی؟

ځواب : د بدن له پاکوالي څخه دا مراد دی چې په بدن باندې به هيڅ قسم پليتي يعنې نجاست نه وي.

([1]) مسايل رفعت قاسمي، ٢ : ٣٢،٣٢، بحواله : البحرالرائق، درمختار، مراقي الفلاح، علم الفقه، ج : ٢، ص : ٢٦، هدايه، ج : ١، ص : ٥٨، کبيري، ص : ٢٠٨.