ډاکټر آصف
په عربي ژبه کې یو متل دي وایی چې: (فلان کتم حب الدنیا اربعین سنة حتی قدر علیه) یعنی فلاني سړي له دنیا سره مینه تر څلویښتو کلونو پورې پټه ساتلې وه تر دې چې پرې قادر شو.
زمونږ د دوه جهادونو قاید حکمتیار صیب نږدې څلویښت کاله د کفر، الحاد، روسانو، کمونستانو، افغان ملتیانو، سیکورستانو، امریکایانو، د حامد کرزي حکومت، د اشرف غني حکومت، آن د حضرت صیب مجددي حکومت، د رباني حکومت، په دې بهانه وسله واله او په څنګ کې ورسره فرهنګي مبارزه وکړه چې ګوندې سوچه اسلامي او د ملت په خوښه منتخب حکومت غواړي، او تر هغې چې سل په سلو کې یو اسلامي حکومت یې په افغانستان کې نه وي جوړ کړې یوه لویشت به هم له خپل موقف نه په شا نشي. نو څلویښت کاله یې د ډالرو دغه مینه پټه ساتلې وه تر دې چې پرې قادر شو، او د سولې او ننواتې هڅې یې ورته پیل کړې، لکه یو عاشق چې معشوقې ته پټ پټونی کوي، کله د چا په واسطه خبرې وراستوي او کله ورته د کوڅو په کونجونو کې پټ وي، زمونږ حکمتیار صیب هم ډالرو، بلډنګونو، فیشني موټرو، د قدرت ګدیو ته ډیره ډۍ ووهله تر دې چې پرون یې د سولې د لاسلیک په نوم دغه هیله پوره شوه، خو اوس دې خدای خیر کړي چې د اربکیانو قومنداني ورنکړي او د هغه چا په خلاف جګړه پیل نه کړي چې تر ننه یې خپل مجاهد وروڼه بلل او ویل به یې چې هر څوک، هره ډله او هر ګوند د فعلي امریکایی حکومت په وړاندې په جهاد کې برخه اخلي دی ورته احترام لري او خپل مجاهد ورور یې ګڼي، او که فرضا نن نه وروسته یې د خپل دغو وروڼو پر خلاف جګړه پیل کړه نو دا متل به پرې هرور مرو مصداق وکړي چې وایی:
د لیونۍ آرمان پوره شو
په لاره ځي په کاڼو ولي زیارتونه
