م- خاموش
د کډوالو د چارو وزارت په کابل کې د المان د سفير سره په المان کې د افغان کډوالو په اړه يوه موافقه لاس ليک کړه، په موافقه کې دا يادونه شوې ده، چې کوم افغانان په جرمني کې تردې دمه په قانوني توګه نه دي منل شوي او په يوه او بل ښار کې د منل کيدو په هيله شپې سباکوي هغه به المان افغانستان ته راليږي.
په کابل کې د المان سفير والتر هسمن د کډوالو دچارو د وزارت سره په ګډه اعلاميه کې وويل، له المانه افغانستان ته راليږلو شوو افغانانو سره به هغه مهال مرسته کيږي، چې په افغاني ټولنه کې بيامدغم شي.
په کابل کې د المان سفير والتر هسمن په يوه مطبوعاتي وينا کې دا هم وويل، کومه موافقه چې د افغانستان او المان ترمنځ وشوه له مخې به یې په يوه الماني الوتکه کې پنځوس تنه افغانا په يوه پيره کې افغانستان ته را استول کيږي.
د اټکل له مخې دا مهال په المان کې تر يولک اتيازرو پورې افغانان ميشت دي، چې د ډيرو یې په المان کې د قانوني ميشتيدنې اسناد نه دي برابر شوي چې د المان دولت به په افغانانو کې چاڼ او غور کوي ترڅو د المان د قانون سره سم به ناقانونه پيژندونکي افغانان له نورو قانوني افغانانوسره بيل کړي.
په کابل کې د آلمان سفیر په خپله وينا کې بيابيا ټینګار وکړ او ویې ويل، چې په خپله خوښه ستنیدونکو کډوالو ته د بیا ادغام مرستې هم ورکولې کیږي…
یوازې په ۲۰۱۵ کال کې آلمان تر ۱۰۰۰۰۰ ډیر افغان کډوال ورسیدل. آلماني چارواکو په وار وار ويلي، چې دغه ټول کډوال په المان کې د منل کیدو چانس نه لري هغه افغانان چې په سيمو کې يې نسبي امن شته په جرمني کې غيرقانوني ميشت افغانان به ور وليږدول شي.
د کابل موجوده اداره سره لدې چې هر کال له نړيوالو مرستندويه ادارو ميلياردونه ډالر ترلاسه کوي، تر اوسه پورې یې د افغانانو برخليک د پرديوهيوادونو د سفيرانو د پريکړو پورې تړلی دى.
په ايران، پاکستان روسيه، المان، اتريش، بلجيم، فرانسه ،ايټاليا او هغو هيوادونو کې چې افغانانو پنا اخستې ده د هغو ټولو برخليک د افغاني چارواکو د بې کفايتۍ له امله د بهرنيو هيوادونو سفيران ټاکي، چې امکان لري يواځې له افغانستانه بهر ميشتو افغانانو نه، بلکې داهم لرې نه ده چې په کندز کې د جګړو له امله له ښاره د تلونکو کندزي ښاريانو ناڅرګند برخليک هم په کابل کې د بهرنيو هيوادونو سفيران وټاکي.
