لیک: س، سیرت
رڼې څپې دهېواد د ځوان شاعر محمد امین شعري ټولګه ده، چې په ښکلې پښتۍ او د نوم سره په سمه او مناسب انځور سره په ۱۳۹۵هـ ش چاپ شوې ده، د کمپوز زیارېې خپله شاعر ایستلې چې په نوي ډیزاین سره ېې نومولی دی.
د کتاب چاپونې او معمول مطابق د کتاب لیکنه لیکلوال د الله د مبارک او متعال نامه څخه پیل کړې ده. داچې کتاب چاته نه دی ډالۍ شوی دا شاعر پورې اړه لري د یوه اوږده لړ لیک وروسته اوږده شجره نسب (ټول پېژندنه ) هم خپله لیکوال کړې ده.
د پیژندنی وروسته سریزه لیکل شوې ده؛ خو د سریزې لیکوال نه دی څرګند چې چا لیکلې؟ په سریزه کې ځینې مفهوم ورکې کلیمی استعمال شوي دي، په معذرت سره کیدای شي د مسلکي لیکوال لیکنه نه وې، د بیلګې په توګه د سریزې په لومړي مخ وروستۍ کرښه کې کاږي (له بده مرغه اوس چې په ټوله نړۍ کې د اسلامی امارت ټغر ټول شوی دی) دا اودې ته ورته جملې شاید د لیکوال د ذهنیت زیږنده نه وي؛ خو ورڅخه لیکل شوي دي.
د ځوان لیکوال محمدامین شعري ټولګه شاید لومړۍ شعري ټولګه وي؛ خو د چاپتون خو به لومړی چاپ نه وي؟ چې تخنیکي تیروتنو ته ېې پام نه دی شوی، لکه یو عنوان څو ځله لیکل، ډیزاین چې د فورم لوستنې ستونزې لري تر اوسه چانه دی کړی، د عنوانونو د ډیزاین نیشتوالی؛ خو دا چې دمخه مو وویل د پښتۍ انځور یې مناسب انځور دی، د کتاب پښتۍ ته ښکل انځوریزه پوښتۍ ویلی شو.
ماته چې د خپل مشر لخوا د څه لیکلو لپاره د ځوان شاعر ورور محمدامین شعري ټولګه (رڼې څپې) وسپارل شوه ډیرخوښ شوم؛ خو دا به زما خپله ناپوهي وي چې د ډیرو سوالیه عنوانونو څخه مې د عنوان اصلي مطلب ترلاسه نه کړای شو.
ځوان شاعر لا د شعر د جوړښت، ژبپوهنې، ردیف، قافیې، مشبه، مشبه به، مجاز او کنایو د تجربو د پسرليو له بڼه ګلونه، نه دي راټول کړي او نه یې په نظم لیکنې هڅه کې د ګلونو ترڅنګ ازغو لاسونه زخمي کړي دي؛ خو د خپل ولس سره یې چې په ځینو شعرونو کې خواله ګري کړې ده، هیله شته چې د ادب په ډګر کې یې د شعر د کښت ګرۍ بڼ تاند شي.
که مونږ ووایو چې د پښتو او یا نورو ژبو وده به په ډیرو کیسو، ناولونو، غزلو، ازادوشعرونو، داستانونو، نثرلیکنو او کتابونو چاپولو سره لاسته راشي؛ خو دا چې یو ځوان لیکوال خپل نظم او یا نثر د چاپ دمخه یو ملګري او استاد ته چې په ادب کې لاس ولري د کتنې او سمونې لپاره ورنه کړي، د ادب د پرمختګ موخې نه شو تر لاسه کولای.
ځوان لیکوال محمدامین په خپلو شعرونو کې د خپل ښه نظر له مخې د ولس ناخوالو ته په هیواد کې روانو شخړو، په خپله خاوره د پردیو بولتونونو او د شرق او غرب د جګړو په دوام د زور ازموینو ښه انځورګیري کړې ده، چې د ځوان نسل لپاره یوه ښه لیږنده مفکوره ده؛ خو ورسره په هم منګه مهال دا یادونه هم اړینه ده چې یو لیکوال باید د وخت د حالاتو جاج واخلي، نظم او نثر ولیکي او خپل راتلونکي کهول ته چې د چپوالۍ او کیڼوالۍ له بویه پاکه لیکنه وي، د یوې سالمې لارښوونې په توګه د ټولو لوستوالو په وړاندې د ښې لوستولۍ سبب وګرځوي.
د لیکوال ورور محمدامین په شعري ټولګه کې مې د مرګ په نامه څوعنوانونه، آفرین، بوره کونډه، لویه هدیره، جوارګر، د مرحوم الفت صاحب په مځکه لیکلی شوی نظم (څومره به ښه وی)، د ژوند دفتر، جفا او نورو کتل؛ خو په ټوله کې به ووایو چې که ځوان شاعر د خپل شعري جوړښت په کښت کې ادبي او فنوني هڅه وکړي د شعر په لوستوالو کې به یې ونډه زیاته شي.
