کابل ټکی کام ۲۸لړم/۱۳۹۵، راپورتاژ: احمدالله مهاجر
له ډېر ې مودې راپدېخوا پلازمینه کابل کې داسې اصول جوړ شوي دي چې کاروباریان د ورځې خپل کارونه د ماښام له رابره کېدو مخکې په بیړه سرته رسوي، تر څو ماښام کې ونه لوټل شي، له ماښام څخه وروسته د غلو وېره ډېره زیاته قوي شوې ده.
خو کابل مېشتي دغه محصور او له اندېښنو ډک ژوند ځکه زیات اندېښمن کړي دي، چې د دغه اصولو د مراعات کولو اعلان د افغان امنیتي ځواکونو له خوا شوی دی، که څوک هم سرغړاوی ترې وکړي، نو په خپله د امنیتي ځواکونو له خوا لوټل کیږي او د اندېښنې بل لامل یې دا هم کېدای شي، چې د سیمې ماشومان د قانون په مراعات کولو باندې سر نه خلاصیږي، نو لازماً داسې پيښيږي چې له کور څخه ووځي، نو په دې صورت کې واړه ماشومان هم خپله جزا ویني او د سړي تښتوونکو له خوا تښتول کیږي او د خوشي کېدو په صورت کې ترې پیسې غواړي؛ خو له کابلیانو سره دا سوال دی، چې دا سړي تښتوونکي او غله څنګه ازاد ګرځېدلای شي؟ او د امنیتي ځواکونو له لوري نه نیول کیږي، نو حتماً د کاسې شاته شاکاسه شته چې مونږ یې نه وینو.
یو تن کابل مېشتی وايي:
«زمونږ د همسایه وو واړه یې وتښتول، نو مونږ له همدغه ډاره نشو کولای، چې له ماښام وروسته ښار ته راووځو، که ښار ته راووځو نو له یو لړ خطراتو سره مخ کیدای شو.»
پلازمینه کابل کې سرتیري بریدونه او د نا پېژانده وسله والو له خوا خونړي بریدونه هم ترسره کیږي، چې کابل مېشتي د دغو بریدونو او د جنائي پېښو څخه هم پوزې ته راغلي دي.
دوی ته ستر سر خوږی دا هم دی، چې له موټرانو څخه يې پليټونه غلا کیږي.
سړي تښتوونکي څوک دي؟
وړاندې هم څوځله په پلازمینه کابل کې تنکي او معصوم ماشومان وتښتول شول، کورنیو یې د رسنیو له لارې د څرګندونو پر مهال وویل، چې د دوی د ماشومانو په تښتول کېدو کې د امنیتي ځواکونو لاس دی.
د اباسین شهید پلار د اباسین له شهادت وروسته د رسنیو له لارې وویل، د ده زوی یې چې کله تښتولو، نو امنیتي ځواکونو رېنجر موټر هم په دغه لاره روانه وه، مونږ اواز ورکړ، چې زوی یې رانه یووړو، مګر دوی هېڅ التفات رانه کړ.
همدا راز فراهي ماشوم نوید هم د ملي امنیت د تحقیق د مدیر په کور کې پیدا شو.
او په خواله رسنیو کې دا ډول انځورونه خپار شول، چې د ماشوم نوید له تښتوونکو څخه یو تن د امنیتي ځواکونو کارمند ثابتوي.
دا مهال هم کابل ښاریان وايي، چې غله د امنیتي ځواکونو په جامه کې د پلټنو په پلمه له کورونو غلا او شوکونه کوي.
د کابل د تیمنو سیمې د یوه تن اوسېدونکي کور ته د امنیتي ځواکونو په جامه کې کسان ورغلي وو، له کور څخه یې غلاوې او شوکونې کړې وې او بې عزتي یې هم ور اړولې وه، د اوسېدونکي له قوله چې سهار یې په حوزه کې ریپوټ چا نه اخیستلو.
مبصرین هم وايي، دا غله خو یا خپله امنیتي ځواکونه دي او یا هم د دوی سره ټینګه اړیکه لري، ځکه د پلازمینې ښار کې خلک په عادي جامو کې هم نه شي ګرځېدلی نو د ټوپک او په پوځي جامه کې به څنګه د خلکو کورونه تلاشي کړي؟!!
بي بي سي پښتو ته یو تن کابل مېشتي ارین وویل، چې په کابل کې امنیت د اندېښنې وړ دی، نوموړي د خپلو څرګندونو په ترڅ کې خپله کیسه وکړه.
«د شپې اته بجې وې، کورته روان وم، چې له یوه موټر څخه وسله وال کسان راښکته شول، زه یې له موټر څخه کوز کړم، لومړی ې ووهلم او بیا یې زما ۲۰۱۲ ډوله کرولا موټر وتښتاوه.»
ارین زیاته کړه، چې د نوموړي کرولا موټر یې داسې مهال وتښتاوه، چې دوی ته نږدې د پولیسو پوسته هم وه.
سږ کال د جنايي جرمونو شمېره څومره ده؟
د کابل د جنایي جرمونو په وړاندې د مبارزې مشر فریدون عبیدي وايي، چې تخمیناً سږ کال په کابل کې تر ټولو ډېرې پېښې د ټپي کېدو دي، چې ښايي شاوخوا ۳۰۰ شمېر ولري، د وژنو د پېښو شمېر شاوخوا ۱۰۰ ښودل شوی دی او ګڼې نورې پېښې لکه غلا هم ترسره شوي دي.
عبیدي دا دعوه هم کړې، چې د پخوا په پرتله په کابل ښار کې امنیتي وضعیت ښه شوی دی او جنایي پېښې هم کمې شوي دي.
یو شمېر کسان بیا په دغو شمېرو نیوکه کوي او وايي، چې دا اټکل ناسم دی.
له بلې خوا د ولسي جرګې امنیتي کمیسون مرستیال عبدالحی اخندزاده د عبیدي دغه څرګندونې ناسمې بولي او وايي چې د تېر په پرتله دوی ته د کابل د امنیتي وضعیت په اړه شکایتونه ډېر شوي دي او دعوه کوي، چې د پخوا په پرتله درې برابره د پېښو کچه زیاته شوې ده او دلیل یې دا دی، دوی چې هره امنیتي غونډه دایره کوي نو د کابل له هرې حوزې خلک ورته راځي او له امنیتي وضعیت څخه شکایتونه ورته کوي.
د کورنیو چارو وزارت پخوانی مرستیال مرزا محمد یارمند وايي:
«کابل کې ځکه امنیتي پېښې ډېریږي چې په دغه ښار کې سیاسي او عادي مجرمین مشران فعالیت کوي او پېچلي جرمونه ترسره کوي.»
د یادولو ده، په کوم ځای کې چې افغان ځواکونه واکمن وي، هلته نا امني او جنايي پېښې زیاتې ترسره کیږي او په کوم ځای کې چې مقابل لوری طالب وسله وال واکمنان وي، هلته سوکاله، اسلامي او با ثباته نظام وي، چې د حق او باطل ښه څرګند تظاهر دی.
