لیکوال: صفي الله “رائد “
کلونه پس مې داځل میدان ښار په سپینو واورو کې پوښلی ولید. د پسرلي په څېر یې سپینو واورو هم ښـکلا یو په دوه کړې وه.
له خپلې کورنۍ سره تر یو څو شپو وروسته مې وغوښتل چې د ژمي په موسم، یخه هوا او سپینو واورو کې د اسلامي امارت تر ولکې لاندې د طالبانو فعالیتونه له نېږدې وڅارم، اراده مې وکړه تر څو د میدان ښار سربېره د نرخ ولسوالۍ ته چې دا څو کاله د طالبان تر کنټرول لاندې ده هم یو چکر ولاړ شم او له طالبانو وروڼو سره له نېږدې وګورم.
همداسې وشول، د طالبانو له یو مسئول سره تر یوې رابطې وروسته نرخ ولسوالۍ ته د یو نېږدې ملګري په لارښونه ولاړم. مازدیګر لمانځه ته د عمرخیلو بازار چېرته چې د طالبانو ګڼه ګوڼه زیاته وه ورسېدم.
د مازدیګر لمونځ مو له طالبانو سره یو ځای په داسې حال کې په جمعه اداکړ چې واوره هم ښه په خوند ورېدله.
تر سلام ګرځولو وروسته مې د دې سترې جمعې امام ته سترګې واړولې، یو دنګ، ښایسته ځوان و،په سپین مخ یې د معصومیت نښې له ورایه ښکارېدلې، یوې ښکلې تورې ولول پګړۍ یې ښکلا لا یو په دوه کړې وه، سپېڅلې نازکې شونډې یې پر مسنونو اذکارو ښورولې او تر ډېر ځنډ چپ ناست و.
تر دعا وروسته مو له نورو ډېری طالبانو سره ولیدل، طالبان دومره خوښ او پُر سکون برېښېدل چې دهر طالب پر شونډو موسکا خپره وه، هر یو به راته او په خندا-خندا به یې را سره ستړې مه شي او روغبړ کاوه.
په همدې ورځ ماښام کې مې ذاهد مولوي صاحب چې د مرکز-میدان ښار نظامي مسئول ده په داسې حال کې ولید چې د ډېرو عامو خلکو سربېره د مرکز دوه نور تکړه مجاهدین الماس او هلال قاري صاحب هم ورسره ولاړ و او په خندا-خندا یې مجلس روان کړی و، خو نه پوهېدم چې داسې کومه خبره وه چې دوی ورته دومره په خندا او خوښ و.
تر روغبړ وروسته مې ترې د میدان ښار او نرخ ولسوالۍ د اوسني وضعیت په هکله وپوښتل؛ راته یې په خندا خندا وویل: رائده!
دالله فضل ده تر اوسه خو هېڅ قسمه مشکل نشته، او ویل یې: مونږ ټول مجاهدین د ولس په خدمت کې مصروف یو او غیور ولس زمونږ په خدمت کې او همدا مو د ژوند برخه ګرځېدلې.
داچې ماښام ناوخته وه، مونږ هم همدلته یو لنډ مجلس وکړ، او د بیا لیدو یې راته وویل او نور سره جلا شو.
دلته هر خوا د سپېڅلو طالبانو ګڼه ګوڼه وه، هر څوک په خپلو کارونو بوخت و،
لنډه داچې په دغو سپینو واورو کې دغه سپین سپېڅلی لښکر دومره په ښکلاو کې پټ او ښه برېښېده چې تعبیر یې نه شم کولای.
میدان ښار چې د میدان وردګو ولایت مرکز ګڼل کېږي، چې د یاد ولایت د نورو ولسوالیو لکه بند چک، سیداباد، جلګه، چغتو، نرخ او جلریز، په څېر د یاد مرکز (میدان ښار) هم ۸۵%سیمه د طالبانو تر ولکې لاندې ده او په پوره توګه پکې فعالیت لري.
