همیشه یې د تور غر لمن نیولې!

دا چې ګل ورته سلام کوي مسکی دی

ګرانبها دی قیــمت نه لري غمی دی

تورې څڼې سپین پټکی نرګسي سترګې

لا تر اوسه پکې ننګ احساس ژوندی دی

همیشه یې د تور غر لمـــن نیولې

خپلواکي یې ضمیر غواړي ازمری دی

سمې دشتې اومیرې ورپسې ګوري

شهادت جام پســې ګرځي لیونی دی

یوځل بیا یې د نیکه تاریخ تازه کړ

په ریښتیا د احمدشاه بابا لمسی دی

ځکه خوښ مې دی چې رب ته یې سر ایښی

زما ځان دی زما روح زما زړګی دی

ای مخلوقه مطمئن پیژندل ګران دی

د یار غـــم دی سوځولی وچ لرګی دی