منصوریان!
مسلم یار
ستا په قدم باندې قدم ږدو منصوريان يو مونږه
منصوره ستا په لاره ځو ستا لارويان يو مونږه
له خپل وطنه به په نره کړو دفاع ملګرو
د غزنوي او ابدالي بابا بچيان يو مونږه
ثاني عمره هېر مو نه يې ستا غيرت ته سلام
په خپل وطن باندې مين يو عمريان يو مونږه
د پتنګانو په شان لوبې کړو اورونو سره
غليم ته زور د مټو ښايو فدايان يو مونږه
په مينتوب کې مو سرونه نذرانه کړل ورته
په عاشقۍ کې ښکارندويه ليونيان يو مونږه
مونږ شاعرانو د قلم په څوکه کړى جهاد
له دې امله ځينې، ځينې بيا غازيان يو مونږه
اى مسلم ياره زمونږ وطن نه پښيمانه تللي
ښکار د غربيانو کړو، د تورو غرو ښکاريان يو مونږه
