سرليکنه
د امریکا دفاع وزیر، جېمز مټېس ویلي دي چې د افغانستان لپاره د نوي پوځي پلان سپارښتنې نهایي کوي، خو تر اوسه په دې برخه کې د ناټو غړیو هېوادونو سره يوې غونډې او د هغوی ونډې ته اړتیا لري، چې په کومه اندازه مرسته د افغانستان راتلونکې امن ساتلو لپاره کولاى شي؟
امريکا به په خپله نوې پاليسۍ سره د دفاع د وزير جېمز مټېس په وينا، نور زرګونه پوځیان افغانستان ته وليږي، څو په افغانستان کې د حکومت د مخالفو وسله والو لخوا د نویو پرلپسې بريدونومخه ونيول شي.
په دې اړه غربي رسنيو بيلا بيل نظرونه راخیستي، خو د افغانستان په اړه د نهایي يا وروستۍ پريکړې پخلې چې څرنګه تګلاره به خپله کړل شي، پوره معلومات يواځې تر سپينې ماڼۍ پورې محدود شوي دي، چې وروستۍ پريکړه به یې ټرمپ کوي.
امريکا چې د افغانستان په اړه د نوې سترانيژۍ پريکړه ځنډولې، دوه لا ملونه لري؛ يو دا چې امريکا سره تر اوسه پورې د ناټوغړیو هېوادونو افغانستان لپاره د نورو پوځونو په ليږلو کومه پريکړه نه ده کړې، او شايد د ناټو غړیو هيوادونو سره امريکا د روانې مياشتې په ٢٥مه يوه غونډه ولري، چې د افغانستان په اړه به ورسره په ټولو مسايلو خبرې وکړي؛ خو دم ګړۍ يو شمېر رسنيو د امريکا د دفاع وزير جيمز مټيس په وينا ليکلي چې شايد افغانستان لپاره به نور پځوس زره عسکر وليږل شي.
دا چې دمخه افغانستان ته د امريکا لخوا په درې يا پنځه زره عسکرو ليږلو بحث روان و، اوس څرنګه پنځوس زرو ته ورسيد؟؟ د دې سپيناوی تراوسه نه دی شوی چې امريکا به افغانستان ته پنځه او که پنځوس زره عسکر ليږي خو!!!
افغانستان ته د امريکا لخوا نور عسکر ليږل به يواځې د امريکا لپاره نه، بلکې افغانستان، ګاونډيو، د سيمې او آن اروپايي ټولنې لپاره ستونزمنه شي، چې په افغانستان کې د بل کړل شوې جګړې اور لا همغسې ژبغړانده دى، او اوس امريکا د جګړې د زياتوالي لپاره نور عسکر هم ليږي.
که د افغانستان لپاره د امريکا په نوې ستراتيژۍ کې نور عسکر ليږل وي، بيا خو په دې سيمه کې د امن لپاره هيڅ ډول فکر نه شي کيداى؛ ځکه چې د نورو پوځونو په ليږلو سره جګړه نور زور اخلي او د مرګ ژوبلې شمير نور هم زياتيږي.
د امريکا حکومت که په دې خاطر د افغانستان لپاره د نوې ستراتيژۍ په اړه په بيړه پريکړه نه کوي چې په اوږد مهاله جګړه، اوږد مهاله غور وکړي؛ نو امريکا دې دا هم ومني چې د اوږده مهال لپاره به د افغانستان د جګړې اوږد مهاله تاوانونه هم وګالي او د روسانو په څير به بيا په خپلو تېروتنو اعترافونه کوي.
دمخه پنټاګون افغانستان لپاره د درې زره نه تر پنځه زرو عسکرو پورې د ليږلو خبر ورکړې و، اوس نه پوهيږو چې د امريکايي چارواکو له ويناؤ رسنيو سمه اخیستنه نه ده کړې او که پنټاګون خپله کړنه کې بدلون راوست، او يا د افغانستان لپاره د نوې ستراتيژۍ برخه د نورو پنځوسو زروځونو زياتوالى دى.
افغان ولس د يو لک پنځوس زرو يرغلګرو پوځونو جګړو ځپلی دی او هم یې د همدې شمير پوځونو وحشتونه ليدلي دي؛ که يوځل بيا امريکا د ناټو په ملګرتيا افغانستان ته پنځوس زره پوځونه راوليږي، افغان ولس به د تېر په څېر ورسره مقاومت کوي او د خپلې پاکې خاوې، دين، عقيدي او افغاني کلتور په خوندي ساتلو کې به د خپلو سرونو په قربانۍ د وحشي پوځونو په مقابل کې ولاړ وي.
امريکا که افغانستان ته د نور پنځوس زره پوځ د لېږد پريکړه وکړي او يا یې کړې ده، دا بهانه کوي چې په دې وروستيو کې پر حکومت د وسله والو طالبانو بريدونه زيات شوي دي، نو د پوځونو په زياتوالي د طالب وسله والو په بريدونو کې کوم کمښت امکان نه لري؛ ځکه د يو لک پنځوس زرو بهرنيو پوځونو په موجوديت کې طالب وسله والو همدا ډول بريدونه کول او اوس یې هم کوي، که نور پوځونو امريکا افغانستان ته راوليږي، د طالب وسله والو د مشرانو له ويناو داسې بريـښې چې خپلو بريدونو ته به د تېر په څېر دوام ورکوي.
امريکا څو څو واره دمخه اعتراف وکړ چې په افغانستان کې مو جګړه بايللې ده، که امريکا هر څو نور پوځونه راوليږي د افغانانو حوصلې به کمزورې نه کړاې شي؛ خو حقيقت دا دی لکه څرنګه چې د امريکا اوسني حکومت د ايران پر خلاف د بيا بنديزونه يادونه وکړه، افغانستان ته د نورو پوځونو په رالېږلو نه غواړي په منځنۍ اسيا کې امن راشي.
