محمد عمر حماد
بدن مو چې ناروغ شي نو په ډیره بیړه ځان تر روغتون رسوو او د ماهر طبیب په لټه کې یو چې معاینات مو وکړي او د صحت لپاره درمل راکړي، خو د روح د ناروغۍ پر مهال د هیڅ کوم طبیب په لټه کې نه شوو نه یې د درد غم راسره شته نه د درمان غم، ځکه خو داسې ورځ تر بلې د ذلت او بربادۍ پر خوا ور رهي یو او تیندکونه وهو.
که په روحاني ډول روغ وای او د الهي وحې درمل مو د نا ارام روح خوراک وای نو د حق او باطل تفکیک به مو کولای شوای، د ژوند د لارې تورې تیارې به مو د حق په مشالونو سره ویشتې، د یار او د اغیار تندي به مو له ورایه پیژندل، د شهدو په نوم د زهرو سوداګر به را معلوم و، د اسلامي امت دښمنانو ته به په ټول اتحاد او اتفاق سره د حق په محکمو سنګرونو کې ددې په پار ناست وو چې هجوم او یرغل را باندې ونه کا او د نړیوال اسلامي قیادت روښانه شمعه به نه راڅخه وژل کیده.
د اسلامي نړۍ د موجوده ټولو ناخوالو او بدبختیو اصلي لامل دا دی چې په روحاني ډول اسلامي امت وژل شوی او قتل شوی دی، له الهي وحې (قرآن و سنت) یې مخ اړولی دی او د غرب په رنګ کې یې ځانونه رنګ کړي دي.
عمر فاروق رضي الله عنه به فرمایل: موږ خوار او ذلیل خلک و الله تعالی په اسلام سره عزتمند کړو، څوک چې له اسلام څخه سیوا په بل څه کې خپل عزت ولټوي الله تعالی به یې ذلیل کړي.
نن موږ د غرب په خود ساخته نظامونو کې خپل عزت، سکون او ارام لټوو ځکه خو الله تعالی ذلیل کړي یو او سکون و ارام یې راڅخه اخیستی دی.
اوس هم وخت لرو چې متوجه شو او په روحاني ډول د ځانونو علاج وکړو، الهي وحې د نا ارام روح د ارام لپاره درمل وکاروو او د حیات (ژوند) له همدې رڼې چینې څخه د حیات اوبه وڅښوو، نو هله به له سکون او ارام سره غاړه غړۍ شوو.
د علامه محمد اقبال لاهوري رحمه الله په کلام درڅخه رخصت اخلم:
شبی پیش خدا بگریستم زار
مسلمانان چرا زارند و خوارند
ندا آمد، نمیدانی که این قوم
دلی دارند و محبوبی ندارند
