محمد نذیر ذبیح
دا زموږ دعا ګانې ولې نه قبلیږي؟
پداسې حال کې چې الله جل جلاله په هرڅه قادر دی او له هغه سره د هېڅ شي کمښت نشته نو دا مونږ چې له الله جل جلاله څخه کوم شی غواړو ولې یې نه راکوي؟
پداسې حال کې چې الله جل جلاله په قرآن کریم کې په متعددو ځایونو کې وعده کړېده که بندګان لما څخه کوم شی غواړي زه یې ورکوم نو بیا دا زمونږ دعاګانې د قبول نه ولې لرې دي؟
دا زمونږ ټول خلک چې په ګڼ شمېر کې او په هر ډول مبارک او غوره ځای او غوره وخت کې لاسونه پورته کوي له الله جل جلاله نه په هېواد کې صلح امن غواړي ددې سره سره دې خلکو ته د صلح او امن نعمت ولې نه ورکول کیږي؟
همدا ډول پوښتنه له حضرت ابراهیم بن ادهم رحمه الله څخه د بصرې په ښار کې وشوه خلکو ورته وویل : یا ابا اسحق الله جل جلاله خو په قران کریم کې وعده کړېده چې تاسې لما څخه سوال وکوئ زه ستاسې دعا ګانې قبلوم دا زموږ دعا ګانې ولې نه قبلیږي؟
حضرت ابراهیم بن ادهم رحمه الله ورته وویل : دا ستاسې دعا ګانې ددې امله نه قبلیږي چې ستاسې زړونه په لسو شیانو باندې مړه شوي دي :
(۱) تاسې الله پېژنئ چې هغه ستاسې پیدا کوونکی او روزي درکوونکی دی لکن بیا هم د هغه د حق د اداء کولو کوښښ نه کوئ .
(۲) تاسې دعوه کوئ چې د رسول الله صلی الله علیه وسلم سره مینه لرئ لکن د هغه په سنتو عمل نه کوئ .
(۳) قرآن کریم لولئ او عمل ورباندې نه کوئ .
(۴) د الله نعمتونه خورئ او شکر ورباندې نه کوئ .
(۵) تاسې دعوه کوئ چې شیطان ستاسې دښمن دی لکن بیا هم تاسې د هغه خبره منئ او د هغه په اشارو تاسې ډېر کارونه کوئ .
(۶) په خوله وایاست چې جنت حق دی لکن د جنت لپاره عمل نه کوئ .
(۷) تاسې وایاست چې دوزخ حق دی لکن بیا هم د هغه نه د ځان خلاصولو لپاره څه عمل نه کوئ .
(۸) تاسې په خوله وایاست چې مرګ حق دی لکن مرګ ته هېڅ ډول تیاری نه کوئ .
(۹) د خلکو د عیبونو په لټه کې یاست او خپل عیبونه درڅخه هېر شوي دي .
(۱۰) په خپلو لاسونو باندې مړي خښوئ او هېڅ عبرت ورڅخه نه اخلئ .
نو پداسې حالت کې به ستاسې دعا ګانې څنګه قبولې شي؟؟
نو په اوس وخت کې هم زمونږ دعا ګانې چې د قبول نه لرې دي نو که خپل ګرېوان ته سر ښکته کړو نو لرې نه ده چې دا ټولې لس نکتې به په مونږ کې هم وي فکر کوم که رښتیا هم دا ټول لس عیبونه انسان له ځانه وباسي نو د هغه دعاء به قبوله شي ددېنه علاوه حضرت ابو هریره رضی الله عنه د یو حدیث روایت کوي په هغه حدیث کې په یو ځای کې رسول الله صلی الله علیه وسلم د یو کس ذکر کوي چې دعاء یې نه قبلیږي فرمایی :
يَمُدُّ يَدَيْهِ إِلَى السَّمَاءِ: يَا رَبَّ؛ ياَ رَبَّ، وَمَطْعَمُهُ حَرَامٌ، وَمَشْرَبُهُ حَرَامٌ، وَمَلْبَسُهُ حَرَامٌ، وَغَذيَ باِلْحَرَامِ، فَأَنَّى يُسْتَجَابُ لَهُ . رواه مسلم
ژباړه : خپل لاسونه د اسمان لور ته اوږدوي او وايي اې ربه ! اې ربه! پداسې حال کې چې خوراک یې حرام وي ، څښلي یې حرام وي ، جامه یې حرامه وي ، غذا یې له حرامو اخیستې وي نو چېرته قبلیږي؟ .
حضرت سعد ابن ابی وقاص رضی الله عنه رسول الله صلی الله علیه وسلم ته وویل : یا رسول الله صلی الله علیه وسلم زما لپاره وغواړه چې زه له هغه کسانو څخه شم چې هر وخت دعاء کوم نو قبلیږي رسول الله صلی الله علیه وسلم ورته وفرمایل :
ترجمه : سعده ! خوراک د پاک کړه بيا به د دعاء قبليږي زما د په هغه ذات قسم وي چې د محمد نفس د هغه په اختیار کې دی یو کس خپلې ګېډې ته یوه حرامه لقمه (نوړۍ) ور اچوي د هغې له امله یې څلوېښت ورځې دعاء نه قبلیږي او هر هغه کس چې غوښه یې د حرامو او له سود نه را ټوکېدلې وي هغې ته اور په کار دی .
نو دې خبرو ته په کتو سره فکر کوم چې هرڅوک پوهیږي چې دا زمونږ دعاګانې ولې له قبول نه لرې دي؟
الله جل جلاله د مونږ داسې جوړ کړي چې لاس پورته کوو نو هره دعاء مو د الله جل جلاله په وړاندې د قبول مقام ته رسېدونکې وي .
