تبصره فرید افغان
پرون د ارګ په جومات کې اشرف غني یوځل بیا د خپلو لاسته راوړنو د توصیف څخه وروسته له وسله والو طالبانو وغوښتل چې له جګړې لاس واخلي او سوله وکړي.
نوموړي پداسې حال کې چې ورسره په څنګ کې لوړ پوړو چارواکو د کشاف په ګډون ځینې د دیني چارو پوهانو او فوځي جنرالانو ګډون درلود یو ځل بیا ګوت څنډنه وکړه چې که طالبان د سولې لار تعقیب نکړي نو سخت به وځپل شي.
د ده په وینا طالبان باید وسله په ځمکه کیږدي او اساسي قانون ته ځان ژمن کړي، نوموړي یوځل بیا د روانې جګړې په ناروا والي ټینګار وکړ.
خو په مجلس کې هیڅ خبریال یا هم د کشاف په څیر ملا نامو دا ونه پوښتل چې جګړه طالب پیل کړې که په طالب ور عطف شوې که طالب پیل کړې ولې او دچا پرضد؟ که پرې ور تحمیل شوې وي نو ولې ترې د بندیز سوالونه کوئ؟
دنوموړي څخه ته د دې خبرې جرئت هم کوم با احساسه افغان ونکړ چې صیب! طالب وایې چې د خاورې او ناموس دفاع اړ کړی یم چې سنګر ته لاړ شم او د دې ځپونکې سیلۍ مخه ونیسم، خو ستا عسکر چې د صلیبي ځواکونو تر چتر او حمایې لاندې د یاد مبارز طالب پرضد جنګیږي ولې او په کومه روحیه؟
که د امریکایی تاړاک پرضد یې د ضمیر رسۍ سسته وي نو اقلا د طالب مخنیوی خو دې نه کا ، هغه خو دې تر خپل هدف نه راګرځوي. طالب خو دا ۱۴ کاله همدا چیغې وهي چې د امریکایی تاړاک له حمایی لاس واخلئ موږ سوله کوو. تاسو ولې د سولې خړو اوبو کې ماهیان نیسئ؟
نوموړی دا وینا وروسته ترهغه کوي چې څو ورځې مخکې یې دځینو هغو سیمو چې د دولت تر کنترول څخه وتلې دي په عقد نکاح شک ښودلی ؤ. نوموړي ویلي ؤ (زه له تاسو پوښتم هغو سیمو کې چې زموږ مشروع حکومت واک نلري آیا د خلکو تړل شوې نکاح صحي ده؟)
نوموړی پداسې حال کې طالبان له جګړې څخه په مرګ ویروي چې طالب مشرتابه تیره ورځ په خپل اختریز پیغام کې څرګنده کړې وه چې (جګړه امریکا پیل کړې او ځنډول او ختمول یې دهغو کار دی، خو افغان ولس به یې پرضد له هیڅ ډول ښندنې څخه دریغ نکوي)
ځینو فعالانو د جمهور رئیس یادې خبرې خورا احمقانه بللې او ویلي یې دي چې که طالب له وژلو ویردلی اوس به د طالب په نوم د مبارزې ډلې نوم په ټولییز ډول د تاریخ له پاڼو ختم وای. د دوی په آند طالب خپله وژنه شهادت بولي او پنځه وخته لمانځه کې یې له رب څخه د اوښکو په بدرګو کې غواړي، بندي کول، ټپي کیدل د رب له لوري د یو امتحان پیلامه بولي او د ژر خلاصون امید ترې لري.
ځینې بیا وایی طالب نن سبا دهغه افغان نوم ده چې نه غواړي بهرنیان دلته ځالې جوړې کړي، د بهرنيانو د کلتور، فرهنګ او فکر کلک مخالف او هغو د هغو د ټولو دسایسو په وړاندې خنډ وي.
نو دا مثبت فکر له شکه پرته اکثریت افغانان لري نو ولسمشر غواړي اکثریت افغانان په مرګ وګواښي چې دا یې بل حماقت دی. ځکه د مثبت فکر ورکیدل محال او ناشونی کار دی.
