تبصره
له څه وخته چې امریکا پر افغانستان د ناټو د غړیو هېوادونو په ملګرتیا یرغل کړی دی، له یوې خوا جګړې ته دوام ورکوي او له بلې خوا د افغانستان په سوله کې د ګاونډیانو، سیمې او ځینې وخت د نړۍ له هېوادونو غواړي چې په افغانستان کې د سولې له بهیره ملاتړ وکړي.
په افغانستان او عراق کې د امریکا پخواني سفیر، زلمي خلیلزاد تېره ورځ ویلي چې که چین په افغانستان کې د سولې غوښتونکی وي، باید پر پاکستان فشار راوړي.
دا ثابته شوې ده چې امریکا په افغانستان کې کله جګړه پیل کړه د هېڅ یوه ګاونډي او یا د سیمې د هېواد رایه ورسره نه وه، بلکې پر افغانستان د امریکایي پوځونو د یرغل مخالفت یې کړی دی. په افغانستان کې چې څومره تباهي امریکا وکړه، نه یواځې دا چې افغانستان ته یې تاوانونه ورسول، بلکې ګاونډي او د سیمې هېوادونو ته یې هم ورسول او دا دی د ترهګرۍ اور منځنۍ اسیا ته په رسېدو دی.
په افغانستان کې امریکا جګړه په خپل سر او خپله خوښه پیل کړې ده. د ناټو دغړیو یوه هېواد مشوره او رضایت ورسره نه شته. په خپله بادارۍ او سرزورۍ سره د ناټو د غړو پر هېوادونو د بروکسل په غونډو کې د جګړې تاوانونه ورتپي.
امریکا لکه څرنګه چې په افغانستان کې د خپلو غلامانو سره دوه مخې پالیسي شړي، دارنګه د افغانستان د ګاونډیو او د سیمې هېوادونو سره یې هم دوه مخې پالیسي غوره کړې ده.
د امریکا د دفاع وزارت، پنټاګون، لوی درستیز او کله د استخباراتو چارواکي پاکستان، ایران او روسیه په افغانستان کې په لاسوهنو تورنوي. د جګړې د دوام او وسله والو ملاتړي یې بولي او چې کله د پاکستاني چارواکو سره لیدنه کوي بیا د افغنستان په سوله کې د پاکستان رول اړین بولي.
د رواني میاشتي په سر کې چې د چین د بهرنیو چارو وزیر د افغانستان د شخړې د حل په اړه له خپله اړخه مرسته او د پاکستان- افغانستان ترمنځ منځګړتوب اړین وباله او افغان چارواکو ته یې د مرستو ډاډ ورکړ. خلیلزاد د چین مرستې ته په اشارې سره وویل چې د افغانستان د شخړې حل کې د چین کردار اړین دی، خو چین باید پر پاکستان هم فشار راوړي چې خپل هدف ته پرې ورسېږي.
د امریکا لوی درستیز د افغانستان لپاره پر ستراتیژۍ د وروستیو خبرو لپاره کابل ته راغلی و، خو د دفاع وزیر جنرال جیمز ماټیس یې په همدې منظور جرمني ته ولاړ.
د افغانستان او سیمې د هېوادونو سره د امریکا د دوه مخې پالیسۍ بل ثبوت دا دی چې د افغانستان په اړه د نوې ستراتیژۍ لپاره د ناټو د غړیو هېوادونو سره به د بلجیم په پلازمېنه، برکسل کې په جوړېدونکې غونډه کې ماټیس وګوري او په افغانستان کې د جګړې په دوام به ورسره بحث وکړي؛ خو له چینه غواړي چې د افغانستان د شخړې په اړه پر پاکستان فشار راوړي.
د هېوادونو سره د امریکا همدا دوه مخې پالیسي ده چې په افغانستان کې جګړه خپله کوي؛ خو سوله له چین او نورو ګاونډیو هېوادونو غواړي.
