راپور تاژ فرید افغان:
د راپورونو له قراره شاوخوا دوه اونۍ کیږي چې په شمال او جنوب کې طالبانو همهاله توندې منظمې او ځپونکې حملې پیل کړې دي.
د حملو زور ورځ تر بلې په پراخیدو دی سیمیز خلک له طالبانو سره د خپلو ټولو شته وو په مټ اوږه په اوږه ولاړ او دې لاینحل جګړې ته د پای په لټه دي.
سیمیز خلک چا مجبوره کړل؟
داسې ښکاري چې له یوې خوا د سیمیزو زورواکو جبر او حاکمیت او له بل پلوه د ډیویډپیټرایس مخترعې پروژې(اربکیزم) خلک مجبوره کړي ترڅو د طالب په ننګه میدان ته راووزي
خو ویل کیږي ځینې داسې ځوانان هم شته چې هیڅکله هم دې ناخوالو په زړه نه وي داغلي، خو یواځې دخپل ایماني او وجداني غیرت په اساس یې د نړیوالو په مشرۍ افغان ځواکونو ته په زړه لمبې تاویږي.
د طالب هدف څه ده؟
طالبانو له سقوط وروسته د افغانستان ملت ته په ښکاره توګه وویل چې د نړیوال کفري تاړاک پرضد دې د روسانو په څیر عام اوتام را وپاریږي او که وړتیا یې نلري اقلا د کمونستانو په څیر دې خپل اقارب د دوی له ملګرتیا منع کړي.
طالبان فکر کوي چې لا تر اوسه هم افغان دولت کامل حاکمیت نلري، د واک اوځواک کلي یې د امریکایانو په لاس کې ده او د سقوط او ثبات ګټه او تاوان یې هم هغوی ګالي.
نو یې د سقوط له پیله بیا تر ننه پورې پرضد له هیڅ نوعې قربانۍ دریغ ندی کړی.
اوس هم عملا د شمال او جنوب د جګړو قومانده د امریکایانو په لاس کې ده او ټاکل شوې چې په لنډ راتلونکي کې زرګونه نور جنګیالي هم را واستوي، نو طالب او ملاتړو ته یې امریکایان او د هغوی په کونجاړه شخوند وهونکي یوډول ښکاري.
د شمال او جنوب ویش:
په تیر کې به چې طالبانو په هر لوري زور ډیر کړي له بلې سیمې به یې حامیان ژر ترژره رسیدل، خو اوس طالبان کوشش کوي چې خارجي او داخلي قواوو ته داچانس ورنکړي.
حکومت په کندوز کې د پرمختګ دعوه وکړه طالبانو یې همجوار مرکزي بغلان تحت مدیرت کړ، آخوا بیا په جنوب کې حکومت د ناوې خبره رسنیزه کړه طالبانو په ګرشک کې د ماتې اخطارونه ورکړل، پدې ډول دوی غواړي د سیمو د سقوط سره سره د هغوی مالي ځواک هم تر ډیره حده له انزوا سره مخ کړي چې پدې ستراتیژي کې تر ډیره کامیاب هم دي.
اوسمهال عملا په فاریاب، بغلان،کندوز،هلمند،کندهار او ګڼو نورو ولایاتو کې د شکیلو لوریو تر منځ خونړۍ جګړې روانې دي.
طالبان وایي عسکر دې د دوی پرضد له مبارزې لاس واخلي او دوی دې پریدي چې په راغلو خارجي ځواکونو دا ډول حملې وکړي، خو د افغان عسکرو سره لاس په لاس نړیوال ځواکونه بیا وایي چې زموږ کړې خواري به هیڅوک هم په اوبو لاهو نکړي، افغان چارواکي یې د غوڅ ملاتړ سره سره د نورو پوځي او مالي مرستو غوښتنه هم کوي.
بلخوا په حکومت کې هم د جنجالونو سوړې راسپړل شوې دي له یوې خوا د ټرمپ متزلزلې پالیسي او له بل پلوه د شمالي ټلوالې ګونځې تندی، بلې خواته د طالب وسلوالو پراخ ځپونکي بریدونه هغه څه دي چې ارګ یې د وارخطایي د پاڼ او پړانګ ترمنځ پریښی دی
د اشرف غني لخوا د طالبانو د تسلیمۍ او ماتیدو غورې، او د نړیوالو بسپنو محدودیت هغه څه دي چې اوس ارګ میشتي د بدیلې لارې غم کوي.
معلومه نده چې دا معرکه به کله د پای ټکی مومي خو د فکر او نظر خاوندان په دې آند دي چې تر څو پورې د خارجيانو وجود دلته وي پر ضد به یې مبارزه روانه وي.
