د فرعون د لور خادمه – کیسه او ګټې یې
عبدالبصیر حامد
له عبدالله بن عباس رضی الله عنهما نه روایت دی، رسول الله صلی الله علیه وسلم وفرمایل:
د معراج په شپه مې یوه سپېڅلې خوشبویي محسوس کړه، نو جبرائیل علیه السلام نه مې پوښتنه وکړه؛ دا دومره ښایسته او پاکه خوشبویي د څه شي ده؟ وې ویل: دا خوشبویي په حقیقت کې د فرعون د لور خادمې او د هغې د اولاد خوشبویي ده؛ هغه خادمې یې چې سر ورګمونزولو. مال هغه څرنګه؟ جبرائیل وویل: یوه ورځ خادمې د فرعون لور سر ګمونځولو، نو ناڅاپه یې له لاسه ګومنځ ولوېدله، او “بسم الله” یې ووېله، ګواکې الله یې یاد که.
د فرعون لور ورته کړه؛ ایا زما پلار دې مراد دی؟!
وېل: نا؛ بلکې هغه الله چې زما هم، ستا هم او ستا د پلار هم رب دی!
د فرعون لور ورته وویل: ایا زما له پلاره پرته دې بل رب هم شته؟!
ویل: هو.
هغې ورته کړه؛ زه به دا ټوله کیسه خپل پلار ته کومه!؟
ول: سمه ده، لاړه شه ورته ووایه.
د فرعون لور دغه کیسه ټوله خپل پلار ته وکړه. فرعون هغۀ (خادمه) راوغوښتله او ترې وې پوښتل: وه فلانکۍ! ایا زما پرته دې هم بل خدای شته؟!
وېل: هو؛ زما او ستا رب الله دی.
فرعون غوا ته ورته له پیتلو جوړ لوښي د راوړلو حکم وکړ، چې رایې وړ، نو له اوبو نه یې ډک او ښې یې په کې ګرمې کړې. نو د دغې خادمې یې یو یو زوی په وار وار کې اچاوو
په دغه مهال خادمې وویل: یو ارمان لرمه؟!
فرعون ورته کړه څه ارمان لرې؟
ویل: دا مې ارمان دی، چې زما او د بچو هډوکي په یوه جامه کې یو ځای خښ کړل شي!؟
فرعون ورته کړه: سمه ده. دغه ارمان خو به دې پوره کړای شي.
نو زامن یې وار په وار هغه لوښي کې اچول کېدل، کله چې د پیو ماشوم وار راغی، نو مور یې لږ په شا سوله، ماشوم سمدستي غو پرې وکړ؛ ول مور جانې! ما هم کې واچوه، ځکه چې د دنیا عذاب د اخرت له عذابه ډېر سپک ده.
(اخرجه احمد ۳/۳۰۹ و الطبراني في الکبیر ۱۲۲۷۹ و ابن حبان ۲۸۹۲).
د پورتني حدیث ګټې:
له پورتنۍ کیسې نه موږ ته لاندې ګټې راڅرګندې شوې؛
- د فتنو په زمانه کې صبر او استقامت کول په کار دي.
- څوک چې په خپل دین کلک ولاړ وي او د الله په مقابل کې له بل هیجا څخه ویره نه لري، نو الله جل جلاله دغه کس ته اجر عظیم ورکوي. لکه څرنګه چې په قران کې الله فرمایي: اِنَّما یُوَفَّی الصّٰبِرُونَ أجْرَهُم بِغَیرِ حِسَابٍ. (سورة الزمر: ۱۰)
ترجمه: صبر کوونکو ته به خپل بې حسابه اجر ورکړای شي.
- له ظالم او سرکشه انسان نه داسې غوښتنه روا ده، چې خپله ګټه دې په کې وي ،لکه په پورتنۍ کیسه کې چې مېرمن له فرعون نه د ځان او بچو د هډوکو یو ځای خښولو غوښتنه کړې وه.
- الله جل جلاله خپلو بندګانو ته له مشکلاتو نه خامخا خلاصون ورکوي.
- د نېکو خلکو کرامت ورنه مالوم شو.
- کوم کار چې خارق العادت وي، هغه هم کرامت پورې اړه لري.
